Xanana sauda Xina nia apoiu ba kestaun nasionál
DILI, 23 setembru 2023(TATOLI) – Primeiru-Ministru, Kay Rala Xanana Gusmão sauda Xina nia apoiu ba kestaun nasionál no salvaguarda Timor-Leste nia soberania, seguransa no interese ba dezenvolvimentu.
‘’Timor-Leste sauda mós Xina nia apoia ba kestaun nasonál no salvaguarda Timor-Leste nia soberania, seguransa no interese ba dezenvolvimentu’’, Xanana afirma iha ámbitu enkontru bilaterál ho PR Xi Jinping iha sidade Hangzhou Repúblika Popular Xina liuhosi komunikadu ne’ebé Agência TATOLI asesu, ohin.
Lider karismátiku Xanana revela, Timor-Leste apoia kooperasaun internasionál, la’òs konflitu, fiar katak kooperasaun mak xavi atu rezolve problema bo’ot sira ne’ebé mundu hasoru, hodi evita funu, apoia dezenvolvimentu ekonómiku no hasoru realidade kona-ba altersaun klimátika.
Nune’e mós, Xefe Governu agradese Xina nia apoiu ba adezaun Timor-Leste ba ASEAN no konsidente katak ASEAN sei sai rejiaun ne’ebé ekonomikamente dominante iha mundu.
Timor-Leste hanesan mós nasaun viziñu pasífiku, nasaun balun risku atu mout, tanba de’it nível tasi sa’e, tanba frakeza husi osidente hodi limita emisaun karbonu.
Entretantu, Timor-Leste hola parte iha organizasaun naun govermental g7+ ne’ebé halibur nasaun 20-resin ne’ebé enfrenta fragilidade no konflitu iha Afrika, ASIA no illa Pasífiku agora hamutuk hodi ko’alia kona-ba koperasaun no asisténsia ekonómika. g7+ agora iha estatutu observadór iha Organizasaun Nasaun Unida (ONU) hala’o nia servisu kona-ba dezenvolvimentu globál ba nasaun membru sira.
Enkontru PM Xanana no Xefe Estadu Xi Jinping akompaña direta hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Administrasaun Estetal, Tomás do Rosario Cabral, Ministru Planeamentu Investimentu Estrateziku, Gastão de Sousa, Ministru Juventude Desportu Arte no Kultura, Nelio Issac no Embaixador Timor-Leste ba Xina, Abrão Santos.
Jornalista: Hortencio Sanchez
Editór : Zezito Silva
