Governu mantein buka dalan apoiu joven kriativu
𝐃ILI, 25 setembru 2023 (TATOLI) – Vise Primeiru-Ministru no Primeiru-Ministru Interinu Mariano Assanami Sabino, motiva joven sira liuhosi dalan polítika hodi fó garantia atu atinje sira nia mehi boot hodi hakarak sai emprezáriu ne’ebé kriativu no inovativu hodi investe iha setór produtivu.
Assanami hato’o lia hirak ne’e iha serimónia entrega prémiu kompetisaun negósiu inovativu ba dala IV-MCI 2023. ho dalan “Promove Empreendedorizmu liuhosi asesu ba kapitál no formasaun negósiu” ne’ebé hala’o iha Hotel Timor foin lalais ne’e.
“Joven sira ne’ebé iha mehi atu sai emprezáriu iha ne’eba, imi sei hasoru situasaun ne’ebé difisil, dala ruma ita monu, depois hader fali, dala ruma ita monu lakon ona esperansa hodi lakohi kontinua, maibé imi tenke foti ida ne’e sai referénsia hodi estuda hosi imi-nia frakasu (Kegagalan) ida ne’e atu hader fila fali”, dehan Assanami liuhosi komunikadu ne’ebé Agência TATOLI asesu, ohin.
Nia dehan, ba joven sira ne’ebé hakarak sai emprezáriu presiza esforsu aan, disiplina, dedikasaun, tanba sai emprezáriu ne’e dalaruma hasoru situasaun monu-hader, maibé kuandu monu ona labele pesimista, maibé tenke foti sai lisaun hodi hadia aan nudar pontu aranka ba dalan susesu nian.
Assanami agradese ba Governu anteriór sira ne’ebé hatur ona polítika ida ne’e, iha IX Governu Konstitusionál sei kontinua buka dalan oioin hodi fasilita nafatin joven kreativu sira atu asesu ba banku hodi halo kréditu.
Ba governador Banku Sentral (BCTL), presiza halo esforsu ne’ebé makas, servisu ho banku sira ne’ebé eziste ona atu bele fasilita joven sira asesu ba kréditu ho kritériu sira ne’ebé fasíl.
Daudaun ne’e, númeru asesu ba kréditu sei menus tebes, tanba kritéria ne’ebé garantia ba banku hodi hetan kréditu liuliu hanesan títulu ba rai ne’ebé seidauk klaru, maibé Governu sei haree.
“Ne’ebé ba governadór BCTL atu haree oinsá simplifika kritéria ba garantia atu asesu ba kréditu, tanba joven barak ne’ebé remata nia estudu iha univesidade sira seidauk iha rai no uma, maibé sira iha vontade atu halo negósiu ne’e presiza haree”, hatete iha komunikadu ne’e.
Joven empreendedorizmu ne’ebé tuir kompetisaun ne’e mai hosi rejiaun tolu mak Rejiaun Leste, Rejiaun Sentral no Oeste.
Iha serimónia entrega prémiu ba manan nain-sira, Primeiru-Ministru Interinu, apresia ho atividade ne’e no husu atu iha kontinuidade hodi promove joven kreativu sira ne’ebé mak iha kompromisu hodi hadia ekonomia familiár hodi tulun dezenvolve ekomonia nasionál liuhosi dalan empreendedorizmu.
Serimónia entrega prémiu ne’e, partisipa hosi, Ministru Komérsiu Indústria, ajénsia internasionál sira no grupu joven kreativu ne’ebé mai hosi rejiaun tolu.
Jornalista: Hortencio Sanchez
Editór Zezito Silva
