PM Xanana konvida investidór xinéz investe iha Timor-Leste

DILI, 25 setembru 2023 (TATOLI)–Primeiru-Ministru (PM), Kay Rala Xanana Gusmão no Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, realiza enkontru ho investidór xinéz.

Durante enkontru ne’e, Xefe Governu introdús programa IX Governu Konstitisionál durante tinan-lima, ne’ebé sei foku maka’as ba kontrusaun Estadu no nasaun.

“Ha’u fó hatene ba setór privadu, iha Governu tinan-lima nia mandatu atu dezenvolve ekonomia no husu ba investe iha saida de’it maka sira bele,” Xefe Governu hateten liuhosi nota ne’ebé Agência Tatoli asesu, segunda ne’e.

Notísia relevante : TradeInvest aprova proposta investimentu 20 ho totál kapitál biliaun $1,2

Enkontru ne’e hala’o iha Otél Sofitel, iha sidade Hangzhou, provínsia Zheuhiang, Xina iha loron sesta (22/09).

Xefe Ezekutivu konsidera, Timor-Leste presiza tebes investimentu estranjeiru ne’ebé bele tulun dezenvolvimentu infraestrutura no ekonomia povu nian.

Xanana Gusmão informa IX Governu daudaun iha kompromisu boot katak daudaun ne’e halo reforma ba lei investimentu no buka fasilita sistema ne’ebé seguru hodi fó fiar ba setór privadu estranjeiru hosi Asosiasaun Nasaun Sudeste Aziátiku (ASEAN, sigla inglés) no Ázia inklui Europa bele loke investimentu.

Xefe Ezekutivu dehan buat ne’ebé Timor-Leste presiza liu maka investimentu infraestrutura estrada, bee moos, portu, aeroportu, agrikultura, peska, setór mina no gás, liu-liu esplorasaun kampu petrolíferu Greater Sunrise no seluk tan.

“Setór privadu sira ne’e sei ba Timor atu haree iha área saida de’it maka sira bele halo, ita sei fó ajuda iha área oin-oin de’it,” Eis Xefe Estadu ne’e subliña.

Xanana rekoñese Timor-Leste sei enfrenta problema barak iha setór oin-oin no rekursu umanu, maibé povu no nasaun iha mehi boot atu hadi’a rai ne’e la’o ba oin ho apoiu setór privadu estranjeiru sira nia investimentu. Tanba ne’e presiza tebes investimentu atu hadi’a infraestrutura no dezenvolve ekonomia Timor-Leste.

Durante enkontru, setór privadu hosi nasaun Xina, Macau, Singapura introdús mós sira-nia profile empreza ne’ebé interesante hakarak loke investimentu iha Timor-Leste tuir área hirak ne’ebé Xefe Governu aprezenta.

Enkontru ne’e akompaña mós hosi Ministru Administrasaun Estatál, Tomás do Rosário Cabral, Ministru Planeamentu Investimentu Estratéjiku, Gastão de Sousa, Ministru Juventude Desportu Arte no Kultura, Nelio Isaac Sarmento no setór privadu reprezenta hosi Diretór empreza Aero Dili, Lourenço de Oliveira, Embaixadór Timor-Leste iha Xina, Abrão Santos no Adidu Komérsiu Indústria Timor-Leste ba Xina, Benjamin ‘Saimesak’.

Jornalista     : Antónia Gusmão

Editora          : Julia Chatarina