DILI, 28 setembru 2023 (TATOLI) – Xefe Governu Kay Rala Xanana Gusmão louva ho komunidade Atauro tanba iha hanoin ne’ebé pozitivu kria tara-bandu hodi kuidadu biodiversidade ne’ebé kapas iha tasi laran.
“Ha’u agradese ba populasaun Atauro, ha’u alerta nafatin ba sira kontinua ho tara-bandu nafatin labele estraga biodiversidade sira iha tasi okos”, Xanana dehan iha Palásiu Prezidensiál, kinta ne’e.
Nia dehan, illa Atauro riku tebes ho biodiversidade iha mundu tanba maioria populasaun la estraga ona rikusoin sira iha tasi okos liuhosi tara-bandu.
“Ida-ne’e ita tenke kuidadu halo didi’ak ita-nia rikusoin sira iha tasi okos ne’e, tanba maluk sira hosi internasionál mai hasai fotografia iha tasi okos haree ba furak tebes ho nune’e mak ita tenke kontinua nafatin hanesan ne’e”, nia hatete.
Tanba Atauro sei sai hanesan sentru importante ida hodi halibur turista estranjeiru sira atu bele hatama reseita ba Estadu.
“Entaun ita tenke prezerva didi’ak Atauro nia biodiversidade ne’e atu halo morin Timor-Leste nia naran iha mundu ho biodiversidade riku tebes”, nia hakotu.
Jornalista: Hortencio Sanchez
Editór : Zezito Silva
