PDHJ preokupa Governu duni negosiante iha Dili
DILI, 03 outubru 2023 (TATOLI) – Provedór Direitu Umanu no Justisa (PDHJ) Virgílio Guterres, preokupa ho situasaun ne’ebé negosiante ambulante sira hasoru iha Dili tanba duni direta hosi Sekretáriu Estadu Asuntu Toponomia no Organizasaun Urbana ho Autoridade Munisipál Dili.
“Ita triste haree situasaun ne’ebé mak ita-nia negosiante sira enfrenta iha Dili laran, la’os foin agora maibé kleur ona, sempre hetan intervensaun hosi Governu rasik, Provedór hanesan entidade ida ne’ebé eziste atu defende direitu sidadaun ninian husu ba autoridade sira maka presiza iha estratejia intervensaun ne’ebé di’ak, la’os halo hanesan agora ne’e”, Virgílio dehan ba jornalista sira iha Palásiu Governu, tersa ne’e.
Nia husu ba parte kompetente atu diskute espasu ne’ebé apropriadu ba komersiante sira.
“Ita la’os mai duni sai de’it sira hosi área ne’ebé tuir lei bandu, ema labele halo atividade negósiu maibé ita tenke hatete ba komunidade sira katak área apropriadu ba halo negósiu, Estadu prepara no tenke ba fan iha ne’ebá, ko’alia ho didi’ak ba sira”, nia hatete.
Nia dehan, halo jestaun ba espasu públika la’os de’it muda komunidade sira hosi fatin ne’ebé sira halo negósiu maibé tenke kria mós kondisaun ne’ebé dignu.
“Prezensa Estadu ninian labele halo intervensaun ohin, tinan oin mak mai kontrola fali ne’e mós lalos, Estadu nia fatin públiku sira ne’ebé labele halo negósiu iha ne’ebá tenke kontrola lorloron atu labele iha ema ruma ba hala’o atividade negósiu iha ne’ebá, agora Governu ba duni depois la kontrola kada loron, ema ba faan nafatin ida-ne’e mak ita la rezolve problema hirak ne’e, Estadu tenke tau nia ema permanente iha área sira bandu labele fan sasan ne’e para ema labele ba fan ona sasan iha ne’ebá”, nia dehan.
Nia hatutan, Estadu la kontrola másima ne’e mak hamosu violasaun direitu umanu makas ba komunidade sira ne’e.
“Hanesan Provedór ne’ebé lidera entidade ne’ebé defende direitu umanu nian alerta ba autoridade sira tenke halo intervensaun ne’ebé ho di’ak, la’os ba duni de’it ita-nia komunidade sira, maibé tenke halo bebeik sosializasaun, tenke halo Dili ne’e sai mós fatin ba sira hotu, la’os halo Dili furak de’it iha Turista sira nia oin, maibé Dili ne’e sai mós esperansa ba nia sidadaun rasik”, nia afirma.
Rekorda fali katak durante ne’e Governu liuhosi Sekretáriu Estadu Asuntu Toponomia no Organizasaun Urbana hamutuk ho Autoridade Munisipál Dili duni no hadau hotu komunidade sira ne’ebé faan sasan iha dalan ninin kapitál.
Fatin hirak ne’ebé, Governu halo intervensaun ba negosiante sira mak tasi ibun Largo Lesidere, Motael, Tasi-Tolu, Comoro no seluk tan.
Aleinde halo intervensaun ba negosiante sira, Governu halo mós intervensaun ba komunidade hirak ne’ebé hakiak animál iha kapitál Dili hanesan fahi ne’ebé nia fatin la dignu no fó impaktu ba ema seluk nia saúude.
Maibé sasan hirak ne’ebé Governu hadau hosi negosiante no komunidade sira lori hotu ba orfonatu sira iha kapitál Dili no seluk tan.
Jornalista: Hortencio Sanchez
Editór : Zezito Silva
