MDRHK ho Saemaul Undong identifika rekursu potensiál iha suku no aldeia
DILI, 05 outubru 2023 (TATOLI) – Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária (MDRHK), Mariano Assanami Sabino, partisipa semináriu nasionál ne’ebé organiza hosi Saemaul Undong Timor-Leste ho objetivu atu identifika rekursu potensiál iha suku no aldeia.
Semináriu ne’e ho tema “Hamosu Ideia Foun Hodi Hadia Moris Povu Nian Husi Baze”
Ministru MDRHK, apresia ho membru Saemaul Undong sira ne’ebé maioria idade produtivu ne’ebé mai hosi aldeia sira iha Ataúro, Aileu no Baukau, iha espiritu atu dezenvolve poténsia aldeia no suku ne’ebé sira hela ba.
Saemaul Undong nu’udar movimentu ne’ebé ho karater servisu koletivu ho objetivu ba dezenvolvimentu ekonomia, sosiál no kulturál iha área rurál.
“Ha’u husu ba imi hotu atu badinas, disiplina, servisu makas ho komitmentu tomak, imi hotu hamutuk identifika rekursu sira iha imi-nia aldeia no suku sira hodi dezenvolve, servisu ne’ebé imi halo hahú ho buat kiik maibé tenke ho vontade hodi kontinua, loron ruma sei sai boot”, Ministru MDRHK, bainhira partisipa iha semináriu ne’ebé hala’o loron ida, iha Sentru Quesadip Ruak, Taibesi, kinta ne’e.
Nia dehan, ema ne’ebé ohin loron sai emprezáriu ho fundu bo’ot, sae karreta didi’ak, uluk sira hahú ho negósiu kiik, sira dalaruma monu maibé ho komprometidu, sira hader fila fali kontinua negósiu, tanba ne’e ba membru Saemaul Undong tomak tenke servisu ne’ebé komprometidu hodi dezenvolve aldeia no suku sira ne’ebé hela ba.
Aldeia no suku sira ne’ebé ohin loron Saemaul Undong moris ona ba, tenke esforsu atu la’o ba oin nafatin, bele sai fatin peskiza ba aldeia sira seluk, atu haree tuir mudansa ekonomia, sosiál no kulturál.
Ministru MDRHK kompromete, ba oin sei vizita hotu aldeia no suku sira ne’ebé ohin loron Saemaul Undong eziste ba, tanba ministériu ne’ebé nia lidera foun ne’ebé servisu direta ba área rurál.
Saemaul Undong Timor-Leste parseria ho Embaixada Korea no Saemaul mós agora daudaun halo parseria ho MDRHK.
Jornalista: Hortencio Sanchez
Editór : Zezito Silva
