TL-Portugál diskute kooperasaun iha área desportu

DILI, 09 outubru 2023 (TATOLI) – Ministru Juventude Desportu Arte no Kultura (MJDAK) Nélio Isaac Sarmento hasoru malu ho Embaxadora Portugál iha Timor-Leste Manuela Bairos hodi diskute kona-ba kooperasaun nasaun rua nian iha área desportu no seluk tan.

“Enkontru ne’e ami ko’alia kona-ba kooperasaun entre Governu Timor-Leste ho Portugál iha área juventude desportu no arte kultura, maibé foka liubá área desportu ne’ebé ita halo ona kooperasaun iha tinan uluk liubá, agora ita husu atu halo implementasaun programa balu liuhosi kooperasaun ne’ebé iha ona”, Ministru Nélio dehan ba jornalista sira iha edifísiu MJDAK Lecidere, segunda ne’e.

Tanba ne’e, MJDAK hato’o ona pedidu ba Governu portugés hodi simu atleta timoroan na’in-ida ou rua atu halo preparasaun antes ba kompete iha jogu olímpiku tinan oin ne’ebé hala’o iha Fransa.

Aleinde ne’e, parte rua ko’alia mós kona-ba biblioteka tanba Portugál iha koñesimentu di’ak ba Timor-Leste atu dezenvolve biblioteka nasionál.

“Sé Governu portugés iha intrese atu ita halo kooperasaun di’ak tebes tanba ita iha hela faze preparasaun atu kria kondisaun balun hodi halo lansamentu ba biblioteka nasionál”, nia hatete.

Embaxadór Manuela hateten, Portugál iha vontade di’ak atu koopera ho Governu Timor-Leste.

“Portugál iha vontade di’ak atu servisu hamutuk ho Timor-Leste tanba nasaun ne’e hola parte mós iha Komunidade Ko’alia Lian Portugés (CPLP-sigla portugés) hanesan nasaun seluk iha Áfrika, Brazíl no seluk tan, entaun ita tenke dezenvolve juventude sira-nia talentu ho didi’ak”, nia refere.

Tuir nia, joven timoroan barak iha talentu ne’ebé brillante atu Governu presiza dezenvolve iha área desportu, biblioteka no arte kultura.

Governu Portugál sei mai ho planu estratéjiku ida no tur hamutuk ho Governu Timor-Leste atu haree kooperasaun sira ba oin.

Jornalista: Hortencio Sanchez

Editór : Zezito Silva