DILI, 10 outubru 2023 (TATOLI) – Diretór Nasionál Formasaun Agríkola, Ministériu Agrikultura Peskas Pekuaria no Floresta (MAPPF), Hipólito Costa, dehan estudante timoroan 51 ne’ebé tuir hela formasaun iha Arava Internasional Center for Agriculture Training (AICAT) Israel iha situasaun seguru.
Nia dehan, relasiona ho situasaun atuál funu entre Israel ho Palestina iha área Gaza la afeta ba estudante timoroan 51 iha Israel no sira kontinua hala’o sira-nia atividade teoria no prátika iha rai Arava.
“Ho situasaun funu atuál ne’ebé akontese entre Israel ho Palestina iha área Gaza, ami halo ona kontaktu ho ita-nia estudante sira ne’ebé oras ne’e daudaun tuir hela formasaun agríkola iha AICAT no bazeia ba informasaun hosi orgaun AICAT no team lider hosi ita-nia estudante sira iha Israel katak ita-nia estudatente sira ne’ebé tuir formasaun iha ACAT Israel sira iha kondisaun di’ak no seguru la hetan problema ruma liga ho situasaun ne’ebé akontese entre Israel no Palestina”, Hipólito Costa ba jornalista sira MAPPF Comoro, tersa ne’e.
“Tanba sira iha Arava no Arava ne’e dook hosi Tel Aviv, ne’ebé ita-nia estudante sira iha ne’ebá la iha problema, sira kontinua halo sira-nia atividade teoria no prátika iha sira-nia fatin hanesan baibain”, nia adianta.
Hipólito informa, totál estudante ne’ebé agora daudaun iha Israel liuhosi programa formasaun Arava Internasional Center for Agriculture Training (AICAT) ba tinan letivu 2023 hamutuk ema 51.
Diretór Nasionál Formasaun Agríkola ne’e hateten, sei kontinua atualiza nafatin kondisaun estudante AICAT 51 hodi hatene sira-nia situasaun hosi oras ba oras no hosi loron ba loron liga ho situasaun atuál ne’ebé akontese iha Israel.
“Ha’u mós sei kontinua halo komunikasaun kontinua ho team lider estudante AICAT sira ne’ebé iha Israel atu ita bele hatene ita-nia ema sira iha ne’ebá ho situasaun ne’ebé akontese iha Israel”, nia konklui.
Jornalista: Natalino Costa
Editór : Zezito Silva
