MPRM toka misaun globál kontribui rendimentu sósiu ekonómiku TL

DILI, 12 outubru 2023 (TATOLI) – Ministru Petróleu no Rekursus Minerais (MPRM) Francisco Monteiro, afirma liuhosi workshop katak nesesáriu tebes atu toka kona-ba misaun globál hodi kontribui ba rendimentu sósiu ekonómiku Timor-Leste nian iha futuru.

“Ita tenke ko’alia asuntu sira iha Ministériu Petróleu ho di’ak atu bele fó benefísiu ba ita-nia nasaun hodi fó oportunidade ba hasa’e númeru empregu iha Timor-Leste,” nia refere durante workshop kona-ba vizaun importante ministériu nian durante mandatu.

Monteiro hateten, programa ministeriál nian ne’ebé boot liu mak dezenvolvimentu ba kampu Greater Sunrise atu dada kadoras mai Timor-Leste.

Programa ne’e iha mós mudansa no ministériu sei haree atu halibur sinerjia hosi dezenvolvimentu refinaria petrokímiku iha Betano no Planta LNG ne’ebé atu koloka iha Beaço ho objetivu atu halo poupansa ba orsamentu no investimentu iha dezenvolvimentu integrada.

“Ohin atividade workshop ida hodi halibur entidade hotu, iha Ministériu Petróleu nian atu ko’alia kona-ba planu asaun annuál no konseitu orsamentu bazeia ba programa, durante mandatu ministeriu nian”, nia dehan.

Ministériu sei diskute makas iha programa no seidauk ko’alia kona-ba orsamentu ne’ebé atu prevé tanba orsamentu hotu sei bazeia ba programa.

“Ita sei ko’alia kona-ba programa, sub-programa, atividade hotu mak foin halo fali mapeamentu ba orsamentu atu hatene los atividade sira-ne’e nesesita orsamentu hira, ita sei to’o iha ne’ebá”, nia adianta.

Jornalista: Hortencio Sanchez

Editór : Zezito Silva