DILI, 18 outubru 2023 (TATOLI)—Governu liuhosi reuniaun Konsellu Ministru ordinária, kuarta ne’e, delibera hodi autoriza loke prosedimentu aprovizionamentu ho karater urjénsia, hodi hola kombustível ba sentrál elétrika Betano.
“Fornesimentu kombustível ba sentrál elétrika ne’e ho durasaun tempu fulan ne’e, ho objetivu atu garante funsionamentu sentrál elétrika no fornesimentu enerjia,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : EDTL-Timor GAP selebra akordu fornese kombustível iha sentrál elétrika Betano
Antes ne’e, Governu deside Timor Gás no Petróleu, Empreza Públika (Timor GAP, E.P) selebra kontratu ho Eletricidade de Timor-Leste, Empreza Públika (EDTL, E.P) hodi fornese kombustível ba sentrál elétrika Betano iha lote tolu.
Kontratu entre parte rua asina iha 20 maiu 2021 hosi Vise Prezidente Refined Products Trading, PetroChina International (Singapore) Pte Ltd, Hu Wei Qiang, no Prezidente Konsellu Administrasaun no CEO Timor GAP, E.P, António de Sousa.
Kontratu entre EDTL, E.P no Timor GAP, E.P, aliña ho objetivu empreza públika rua ba interese públiku, ne’ebé bazeia ba kontratu ne’e, Timor GAP, E.P sei fornese kombustível ba sentral elétrika Betano durante tinan-tolu nia laran, hahú hosi 2021 to’o 2023, ho kustu kontratu millaun $59.
Nune’e, fornesimentu gazodutu ba sentrál elétrika Betano, hosi Timor GAP, hetan liuhosi kontratu ho PetroChina, hodi lori gazodutu 500PPM sulphur ho +/- 15,000 Kilolitru ba sentrál elétrika Betano.
Enkuantu sentrál elétrika Hera fornese hosi Esperansa Timor-oan (ETO).
Jornalista : Antónia Gusmão
Editora : Julia Chatarina
