SEF : Foho-lolon ne’ebé molik prioriza refloresta
DILI, 19 outubru 2023 (TATOLI) – Sekretáriu Estadu Floresta (SEF), Fernandinho Viera, promete sei halo reflorestasaun ba foho-lolon sira ne’ebé agora daudaun ne’e molik ona.
Nia rekoñese, iha foho balun ne’ebé agora hahú molik ka konsidera área krítiku ka la iha tán ai-horis, tanba ne’e, iha polítika Governu, SEF fó prioridade ba reflorestasaun, hodi promove no konserva no prezerva hikas ai-parapa hodi kuda iha área kosteira sira, aleinde ida-ne’e mós sei kuda ai-horis sira iha foho lolon sira ne’ebé agora molik daudaun ona.
“Ba área foho lolon sira-ne’e, iha polítika Governu, ita nafatin iha planu atu halo reflorestasaun no agró-floresta ba ita-nia foho lolon sira ne’ebé ita haree hahú molik”, Fernandinho Viera ba jornalista sira bainhira konklui kuda ai-parapa iha tasi-ibun, Wenunuc Metinaro, kinta ne’e.
Nia dehan, tinan ne’e, SEF planeia prodús viveiru ho tipu oinoin hodi kuda iha área sira ne’ebé identifika hanesan área krítiku ba florestasaun no agro-floresta.
“Ita sei kontinua halo atividade kuda ai-oan sira iha foho sira ne’ebé ita identifika sai ona área krítiku liuliu foho sira hahú molik, ita-nia komunidade sira ai-horis mak la moris ita sei kuda atu bele refloresta, ita-nia foho sai buras liután”, nia adianta.
Fernandinho Viera husu ba komunidade sira atu partisipa ativa iha atividade kuda ai-oan sira atu ita bele refloresta filafali área sira ne’ebé konsidera hanesan krítiku ona ba degrasaun florestál.
“Reflorestasaun ne’e Governu kontinua responsabiliza, maibé husu sidadaun hotu tenke responsabliza hanesan sidadaun tenke kuda sentidu responsablidade tenke iha nasionalizmu”, nia hateten.
Iha fatin haesan, Xefe Departementu Kosteira hosi Sekretáriu Estadu Peska, Manuel da Cruz, realsa, Departamentu Kosteira rejista iha grupu viveiru prepara ai-oan hamutuk 27.
Nia dehan, hosi grupu viveiru prepara ai-oan hamutuk 27, sira prepara ai-oan ho tipu oioin, tanba Governu sei kontinua halo parseiru ho grupu sira ne’e hodi insentiva sira atu grupu sira envolve atividade kuda ai-oan atu bele reflosta fali área ne’ebé tama ona ba área krítiku.
Jornalista: Natalino Costa
Editór : Zezito Silva
