Horta preokupa Governu la prioriza setór agríkola hanesan prioridade nasionál
DILI, 24 outubru 2023 (TATOLI) – Prezidente Repúblika José Ramos Horta preokupa tanba Governu la tau prioridade ba setór agríkula hodi depende de’it ba produtu importasaun.
“Durante tinan 20 ba kotuk to’o mai ohin loron, Governu nunka tau agrikultura hanesan prioridade nasionál no setór agrikultura nunka tau osan ho lolos”, Ramos Horta dehan iha Vila-Verde, ohin.
Nia dehan, Governu la tau agrikultura hanesan prioridade nasionál mak Timor-Leste sei hasoru problema hamlaha tanba dependénsia ba importasaun bainhira problema mundiál ba hamlaha, fó ona impaktu tanba laiha alternativu iha nasaun laran.
Tanba ne’e, nia husu ba Ministériu Agrikultura atu kria polítika hodi dezenvolve agrikultura no fó apoiu tékniku.
“Ha’u sei haree orsamentu tinan 2024 nian, orsamentu ba Ministériu Agrikultura atu halo saida no apoiu saida ba agrikultór sira”, nia relata.
Tuir nia, munisípiu barak iha potensiál ba agrikultura hanesan, Ainaro, Manufahi, Manatuto, Bobonaro no seluk tan Governu tenke iha polítika ne’ebé di’ak atu dezenvolve no fó subsídiu ba agrikultór sira atu dezenvolve agrikultór hodi bele asegura ai-han iha rai-laran.
Jornalista: Hortencio Sanchez
Editór : Zezito Silva
