MAP sei halo barrajen ba mota tolu hodi fornese bee ba agrikultór
DILI, 24 outubru 2023 (TATOLI) – Ministériu Agrikultura, Peskas, Pekuaria no Floresta (MAPPF), Marcos da Cruz, hateten MAPPF sei halo barrajen ba mota bee lulik iha Ainaro, mota iha área Manufahi no mota Laclo ho objetivu atu fornese bee ba agrikultór sira.
“Hosi ita-nia estudu ba mota sira ne’e iha mota tolu mak ita kosidera priénse ba dezenvovimentu konstrusaun barajen atu bele halo konservasaun no prezervasaun bee bainhira Timor-Leste hasoru bain-loron naruk. Mota tolu ne’e mak Mota Bee Lulik ne’ebé iha Ainaro, Mota ida iha área Manufahi no mota Laclo”, Ministru Marcos iha nia intervensaun iha serimónia lansamentu fini ho variedade foun haat ne’ebé iha Salaun São José Catedral, tersa, ohin.
Nia dehan, iha Governu anteriór, planu atu halo estudu ba mota iha Timor-Leste tomak ho objetivu atu konserva no prezerva bainhira ita enfrenta bailoron naruk, mota sira-ne’e mak bele sai alterantivu hodi fornese bee ba komunidade no agrikultór sira.
Marcos hateten, ekipa téniku sira kontinua halo hela estudu ba mota hamutuk 15 iha teritóriu nasionál, hosi estudu ne’e deside mota tolu mak priénse kritériu atu dezenvolve barajen, karik bainhira Timor-Leste enfrenta bainloron naruk, entaun bele fornese bee ba komunidade sira inklui agrikuktór sira atu bele kontinua halo atividade agrikultura nian.
Governante ne’e esplika, Governu la fó de’it prioridade ba mota tolu ne’e, maibé sei kontinua halo estudu ba mota sira iha territóriu nasionál ho objetivu atu prezerva no konserva bee.
“Ita halo ona dezeñu barajen ba mota tolu ne’ebé ita temi ona ne’e, maibé Governu sei konstrui barajen atu ita bele konserva bee ba aban bainrua. Maibé ita mós sei kontinua halo estudu ba mota sira seluk iha territóriu nasionál”, nia adianta.
Aleinde ne’e, Marcos da Cruz promete sei koalia ho Sekretáriu Estadu Floresta atu tau prioridade ba kuda ai-oan ne’ebé besik bee matan sira atu bele konserva no prezerva bee barak liután.
Jornalista: Natalino Costa
Editór : Zezito Silva
