DILI, 25 outubru 2023 (TATOLI) – Ministru Dezenvolvimentu Rurál no Habitasaun Komunitária (MDHK), Mariano Assanami Sabino, hamutuk ho Cooperativa Caffe Timor (CCT), halo lansamentu ba kuda Kakau no Vanilla iha, Bairro RSS/Pato, Suku Fuiloru, Postu Administrativa Losplos, Munisípiu Lautem.
Programa lansamentu ne’e organiza hosi Embaixada Nova Zelandia ho CCT ne’ebé servisu hamutuk iha setór agríkola ne’ebé foku ba produtu kuda Kaffé, Kakau, Vanilla, Cenke no Pimenta.
Tuir dadus ne’ebé iha, iha Lautém CCT distribui ona Kakau hun hamutuk rihun-50, Vanilla rihun-25, Pimenta no Cenke rihun-3, ba povu agrikultór sira iha Lospalos.
Iha territóriu nasionál, CCT distribui ona Kakau hamutuk rihun 500, Vanilla hamutuk rihun 600, Cenke rihun 500, Pimenta rihun 15, ne’e ba agrikultór hamutuk rihun 15 iha nivél nasionál no iha Lautém de’it sira fó asiténsia ba mil agrikultór sira.
“Ha’u mai hanesan Ministru Dezenvolvimentu Rurál, atu haree poténsia iha rurál, poténsia sira ne’ebé seidauk utiliza másimu ho dezenvolvmentu intregradu ne’ebé mak tun mai husi setór oioin, agrikultura, floresta, pekuaria, kooperativa, edukasaun rurais, saúde rurais, nutrisaun rurais”, dehan Assanami liuhosi komunikadu ne’ebé Agência TATOLI asesu hosi media Vise Primeiru Ministru, ohin.
Assanami informa, vizita ida-ne’e bazeia ba programa Nova Zelandia nian, maibé bainhira remata tiha diskusaun orsamentu no elesaun suku, hafoin komesa halo dezenvolvimentu rurál hodi tuur hamutuk ho xefe suku, xefe aldeia sira, prezidente munisípiu, profisionál sira ho diresaun agrikultura, diresaun floresta, diresaun pekuaria, diresaun kooperativa, komérsiu indústria atu bele haree no planeia oinsá ordena didi’ak dezenvolvimentu iha kraik.
Dezenvolvimentu Rurál, nu’udar ministériu foun ne’ebé mak la’os setorál, maibé zona rurál no urbana. Ezemplu; edukasaun, saúde, agrikultura.
Tanba ne’e , ministériu sei halo koordenasaun ho ministériu hothotu atu integra dezenvolvimentu iha kraik, koordena didiak ho munisípiu sira atu útiliza másima rai ne’ebé mak iha, poténsia ekonómia no poténsia rekursu umanu ne’ebé iha.
Aleinde atu rezolve problema lubuk ida ne’ebé mosu iha kraik, mak problema sosiál, problema kulturál, problema edukasaun liuliu ba nutrisaun ne’ebé mak seidauk di’ak, merenda eskolár ne’ebé mak seidauk di’ak no problema seluk ne’ebé mak iha kraik.
Ministériu ne’e halo koordenasaun atu komesa ordena no integradu ona programa ne’ebé mak iha ne’eba, reforsa liu ezisténsia munisipál, karik ba oin iha eleisaun bele halo servisu di’ak kuandu iha ona autoridade munisipál, reforsa liu estrutura ne’ebé mak iha kraik hanesan polísia komunitária no autoridade komunitária ne’ebé haree husi programa PNDS.
Nia revela, dezenvolve fali rekursu ema atu bele útil, estrada ho bee ne’ebé mak iha, estrada ne’ebé mak iha tenke útil, se la’e bele iha estrada di’ak, maibé la útil, iha Laútem iha bee Ira-lalaru iha bee lubuk ida iha rai okos, maibé seidauk utiliza másima, hanoin ba teknolozia iha futuru hanesan irrigasaun, vizita ne’e ba Nova Zelandia, maibé halo ona mós diskusaun ho komunidade, estrutura ministériu agrikultura ne’ebé iha.
Jornalista: Hortencio Sanchez
Editór : Zezito Silva
