BAUCAU, 28 outubru 2023 (TATOLI) – Rezultadu eleisaun komunitária iha suku Tirilolo, postu Baucau Vila kontinua hakat ba volta daruak hafoin kandidatura na’in-rua la konsege pursentu 50+1.
Hosi rezultadu apuramentu suku fó-sai kandidatura nain-haat hosi suku Tirilolo, hela na’in-rua hanesan xefi suku atuál Ricardo Ernesto Belo no Elvino Freitas Belo mak hakat ba volta daruak, enkuantu kandidatura nain-rua seluk hanesan Aldermiro Belo no Martinho Belo tenki elimina.
Rezultadu kontajen votu Elvino Freitas Belo sai vendedór dahuluk ho totál votus hamutuk 1.470, tuir kedas Ricardo Ernesto Belo ho totál votu hamutuk 1.450, Aldermiro Belo hamutuk 440 no Martinho Belo hamutuk 162.
Xefi suku atuál Ricardo Ernesto Belo, hateten, prontu atu hakat ba eleisaun komunitária volta daruk no husu atu Sekretariadu Tékniku Administrasaun Eleitorál (STAE) hadi’a sistema eleisaun nune’e komunidade bele partisipa másimu.
“Prontu nafatin, importante mak tenke iha kondisaun di’ak iha eleisaun novembru mai,” Ricardo Belo informa ba Agência TATOLI iha sede suku Tirilolo, Vila Antiga, tersa ne’e.
Totál eleitór ne’ebé partisipa iha eleisaun suku hamutuk 3.523 hosi totál eleitór 6.877 iha suku Tirilolo kompostu aldeia neen hanesan Betulale totál partipasaun eleitór 1.105, Caisido 400, Lialailesu 208, Lutumutu 1.209, Osso-ua 330 no Parlamentu hamutuk eleitór 131.
Eleisaun komunitária iha munisípiu Baucau rezulta apuramentu aldeia, suku to’o postu administrativu neen fó-sai suku hamutuk 59 iha Baucau, suku 35 mak hakat ba volta daruak hosi tótal kandidatura xefe suku 74 no suku 24 mak konsege iha xee suku volta dahuluk.
Jorinalista : Natalino Belo
Editór : Evaristo Soares Martins
