MAP presiza fó fundu-asisténsia tékniku ba grupu pekuária iha área rurál
DILI, 30 outubru 2023 (TATOLI) – Na’in ba Vaca Vani ENIN, Adilio Baptista Lopes Marques, husu ba Governu liuliu Ministériu Agrikultura no Peskas (MAP) atu fó apoia fundu no asisténsia tékniku ba sidadaun sira ne’ebé iha inisiativa no vontade investe iha área pekuária iha área rurál.
“Ha’u halo investimentu ki’ik-oan ida iha área pekuária liuliu haki’ak fahi, maibé haki’ak ho vontade no ho konesimentu ne’ebé iha tanba dala barak iha foho ka área rurál laiha asisténsia tékniku no fundu hosi autoridade kompetente ba grupu pekuária sira. Tanba ne’e bao in governu tenke foku apoia ida ne’e”, hatete Adilio Lopes iha estúdio Agência TATOLI, Faról Dili.
Nia husu mós ba Governu atu ativamente halo akompanamentu ba komunidade ka grupu ne’ebé haki’ak animal iha área rurál atu bele haki’ak ho susesu.
“Ita presiza pesoál saúde animál sira atu fó formasaun ba haki’ak na’in sira atu oinsá bele halo prevensaun ba animál liuliu fahi sira labele mate árbiru,” nia rekomenda.
Adilio Lopes hahú nia investimentu iha área pekuáriu liuliu hakiak fahi iha tinan 2019, iha aldeia Loikere, suku Mehara, Postu Administrativu Tutuala, Munisípiu Lautém.
“Ha’u hahú sosa matéria ba konstrusaun ba fahi luan hamutuk ho alin-rasik, kolega sira barak mak ajuda hodi estabelese, maske seidauk tuir padraun ida loloos ida ita hakarak, maibé ho infraesturutura minímu ne’ebé ita iha ona faze ka prosesu produsaun ni’an”, katak nian.
Nia dehan maske haki’ak fahi ho konesimentu nato’o de’it, maibé konsege haki’ak fahi lima ba na’an, fahi produsaun iha 13 no fahi aman-rua no bibit 20.
“Ami hahú iha 2022 liuhusi preparasaun infraestrutura ita iha bibit 20, nune’e tinan oin bele iha tan bele iha fahi 40 ka 60 nune’e ita responde ona na’an tonelda 1,1 ba merkadu. Ema barak hakarak sosa na’an, maibé produsaun menus husi haki’ak na’in sira”, nia afirma.
Investe setór pekuária ne’e, nia konsidera iha dezafiu barak, maibé husi dezafiu fó biban ba nia atu buka dalan ka meiu atu aprrende ho kolega ka instituisaun relevante sira hodi hakat liu obstákulu sira ne’e.
Notísia relevante: MAP Identifika Fahi Mate Tanba Kauza Husi Moras ASF
Jornalista: Jesuína Xavier
Editór : Florencio Miranda Ximenes
