BOBONARO, 30 outubru 2023 (TATOLI)-Polísia Nasionál Timor-leste (PNTL) munisípiu Bobonaro ho Diresaun Nasionál Transporte Terrestre (DNTT) Delegasaun Territoriál Munisípiu Bobonaro, segunda ne’e, halo pasa revista supreza ba movimentu transporte públiku no privada sira ne’ebé viola regulamentu liuliu lei kodíku estrada.
“ ‘Cek-Point’ ne’ebé realiza iha Komandu PNTL munisípiu Bobonaro nia oin ne’e ekipa konjunta konsege halo apreensaun ba motorizada hamutuk unidade 53 no karreta 6, infrastór hirak ne’e maioria laiha karta kondusaun, la uza asesoria no dokumentu liu ona prazu validasaun,” Komandante PNTL Munisípiu Bobonaro, Superitendenti Xefe Polísia, António Maria de Sá, hateten ba jornalista sira iha Maliana.
Notísia Relevante:DNTT Presiza Sosializa Nafatin Kódigu Estrada Ba Utilizadór Dalan Públiku
Tuir Komandante PNTL ne’e katak objetivu hosi operasaun ne’e atu hare moos kona-ba armas brankas lori sasán kro’at ka hanesan tudik, samurai, rama ambon, kilat no seluk tan hodi prevene konflitu durante loron finadu.
“Tanba loron bo’ot sira hanesan kuaze movimentasaun ne’e la’ós de’it hosi kapitál Dili maibé hosi parte nasaun viziñu mós mai entaun ita halo nia intevensaun lubuk ida,alende ita kontinua aktualiza asesories sira ne’ebé mak transporte ne’e rasik iha,dukumentu legais sira hosi motorista no mós karreta inklui lisensa hanesan SIM,” Nia dehan.
Durante fulan-outubru 2023, nia esplika mosu asidente trafegu barak iha kapitál Maliana tanba fatores umanu, hanesan kondús transporte ho kondisaun lanu, kondisaun transporte, dalan aat no seluk tan.
Nia hateten atu prevene mosu asidente trafegu durante loron boot sira, ekipa konjunta sei kontinua intensifika liután operasaun iha terrenu liuliu fatin hirak ne’ebé identifika sirkulasaun públiku la’o maka’as.
“Ita atu prevene númeru asidente ne’e redúz entaun ita kontinua nafatin fó hanoin ba utentes via públiku sira liu-liu utilizadór transporte sira para bele kompleta sira-nia dokumentu inklui mós sira nia asesoria sira para bele salva sira-nia vida,”Nia hateten.
Iha sorin seluk, Reprezentante Diretór DTT munisípiu Bobonaro, Tomas Maia, reforsa operasaun konjunta ne’e atu haree liuliu konabá transporte Estádu ne’ebé halo movimentu durante loron finadu maibé laiha karta autorizasaun hosi instituisaun.
“Ita labele kontente ho reseitas maka’as ne’e ita-nia servisu mak ladun másimu ema kumpre barak liu ida ne’e mak ita foin susesu maibé ami husu ba komunidade nafatin kumpre regras tanba ita utiliza estrada ho kondisaun kompletu bele asegura ita-nia vida no mós ema seluk nia vida,”Nia hateten.
Notísia Relevante:PNTL sei koordena ho DNTT regula bisikleta elétrika iha Maliana
Jornalista: Sergio da Cruz
Editór: Agapito dos Santos
