DILI, (TATOLI) – Xefe Departamentu Seguransa Rodoviária Diresaun Nasionál Transporte Terrestre (DNTT), Maria Antónia, hatete DNTT presiza sosializa nafatin kódigu estrada ba motorista, kondutór, komunidade no eskola oan sira, nune’e bele konxiente oinsá uza dalan públiku.
Relasiona ho kondutór no motorista balun ne’ebé viola kódigu estrada hanesan sinál tránzitu ne’ebé tau katak labele para, maibé sira para nomós ema sira ne’ebé lori motór lauza kapasete tuir DNTT katak ida konsiénsia ema ida-idak nian.
Tanba bainhira sira bá tuir ezame atu hetan karta kondusaun matéria sira ne’e fó hotu, mas haree ba realidade loroloron latuir buat sira ne’ebé iha bainhira sira ezame atu hetan karta kondusaun ne’e.
Tanba ne’e presiza halo sosializasaun no fahe informasaun beibeik ba eskola, komunidade, kondutór no motorista transporte públiku, nune’e sira bele iha konxiénsia oinsá uza dalan públiku liuliu minimiza asidente.
“Ita haree katak kondutór transporte públiku nian dalabarak halo violasaun kuaze ita haree iha CCTV (kámara videovijilánsia) ne’ebé hatudu, sira para latuir nafatin regra ne’ebé iha, entaun husi parte DNTT presiza nafatin fahe informasaun, nune’e sira bele konxiente oinsá uza dalan públiku”, Maria Antónia afirma iha Balide, ohin.
Sobre divulga informasaun ba kódigu estrada nian iha 2018 DNTT halo ona sosializasaun kona-ba seguransa rodoviária nian iha munisípiu Aileu, Ainaru, Ermera no Likisá no daudaun iha mós planu atu hala’o filafali iha eskola sekundária sira, tanba haree katak dalabarak sira maka viola liu regra.
“Karta kondusaun balu iha, maibé presiza servisu hamutuk ho polísia, nune’e bele kontrola oinsá atu hatene sira iha karta kondusaun ka la’e? Ami presiza servisu hamutuk ho polísia hodi halo auto stop (pasa revista) ruma hodi hatene motorista sira ne’ebé lori motór no karreta iha karta kondusaun ka la’e”, nia haktenik.
Tanba ne’e ho violasaun ne’ebé halo presiza iha medida rigoroza ida, tanba durante ne’e iha kódigu estrada bandu labele uza motór kanu racing, maibé sira uza nafatin.
Tanba ne’e iha revizaun kódigu estrada DNTT tau multa boot tebes atu nune’e bele fó hanoin ba sira ne’ebé uza motór kanu racing hodi hasa’e ba dólar 500 no iha kódigu estrada iha sansaun bainhira para sala, kontra sinál tránzitu ne’ebé regula utilizadór transporte sira.
Tanba ne’e Maria Antónia husu ba motorista no kondutór sira liuliu eskola oan sira bainhira lori transporte públiku ka privadu iha dalan públiku di’ak liu kumpre regra ne’ebé hatuur ona, nune’e salva ita-nia vida no ema seluk nia moris mós.
Xefe Departamentu Tráfiku, João Eugenio Cabral da Siliva, hatete ba motorista no kondutór ne’ebé kontra sinál tránzitu, DNTT lahalo kontrolu ba estrada, nune’e sempre koopera ho Polísia Tránzitu Munisípiu Dili no nasionál atu haree.
“Tanba sira maka halo kontrolu iha estrada, sira maka dadersán no loraik hamriik iha estrada no husu atu sira atende másimu ba kondutór sira ne’ebé sempre kontra beibeik sinál tránzitu. Dalabarak polísia halo auto stop ba sira no ami mós hamutuk ho polísia halo chek point ba sira, sempre razaun ne’e dehan laharee, lahatene ne’e maka sira fó beibeik ba ami. Ba ami lasimu tanba ita hanesan motorista lori motór ka karreta la’o iha estrada tenke haree estrada ne’e sinál saida maka iha ne’ebá”.
Tanba ne’e DNTT liuliu Departamentu Tráfiku husu para motorista sira respeita no obedese ba sinál ne’ebé iha para labele akontese asidente ne’ebé halo susar fali ema seluk.
Nune’e ho akontesimentu ne’ebé akontese, DNTT nia devér hodi koopera ho polísia oinsá haree asuntu ne’e, tanba perigu tebes bainhira ema lori karreta liuliu ba motorista transporte públiku sira tanba lori ema barak, nune’e DNTT iha hanoin oinsá fó teste ne’e rigorozu liu bainhra atu hetan karta kondusaun.
Jornalista: Maria Auxiliadora
Editora: Rita Almeida
