PNTL sei koordena ho DNTT regula bisikleta elétrika iha Maliana
MALIANA, 04 agostu 2023 (TATOLI) – Polísia Nasionál Timor-Leste (PNTL) munisípiu Bobonaro, sei koordena ho Diresaun Nasionál Transporte Tarrestre (DNTT) delegasaun territoriál munisípiu hodi regula sirkulasaun bisikleta elétrika ne’ebé movimenta iha kapitál Maliana.
Komandante PNTL munisípiu Bobonaro, Superintendente Xefe Antoninho Mauluta, preokupa ho sasán refere tanba iha minoridade barak mak konduz hodi halo movimentu ba mai iha dalan públiku no la tuir regra tránzítu nian.
Nia dehan, durante ne’e parte tránzitu seidauk halo intervensaun tanba seidauk iha orientasaun hosi Goveru no despaxu hosi komandu jerál PNTL.
“Ha’u sei orienta tránzitu atu koordena ho DNTT atu haree asuntu ne’e, ba oin sira presiza iha karta kondisaun ka lae, tanba nia uza mudansa ne’e nia klase hanesan ho motorizada ona, entaun nia mós tenke iha dokumentu,” nia ko’alia iha Maliana, kinta ne’e.
“Tuir ita-nia haree, iha tempu ida sira he’an, maibé iha tempu ida, wainhira sira karrega nia mós hanesan motorizada, tanba ninia mudansa ne’e to’o 3. Ida-ne’e mak ita preokupa, ida fali tanba sira halai latuir nia diresaun no mós sira la uza kapasete,” komandante ne’e preokupa.
Tuir nia, bainhira utente sira la uza kapasete no la tuir regra rodoviáriu sei fó perigu ba sira-nia vida tanba kapitál Maliana movimentasaun karreta ho motorizada barak liu.
Komandante PNTL munisípiu Bobonaro ne’e sei relata mós ba Komandu Jerál PNTL atubele hatún orientasaun ruma atubele haree kestaun ne’e.
“Ita akompaña iha televizaun, ita-nia Ministru Transporte nia mós ko’alia ona, levanta ona liuliu iha Dili, oinsá atu koloka sira-nia fatin halai halo nusá,” Mauluta haktuir.
Tuir observasaun Agência Tatoli iha kapitál Maliana, haree katak iha tempu dadeer labarik sira balun lori bisikleta elétrika ne’e ba eskola no balu minoridade sira tula malu halai ba mai iha merkadu Maliana no parte Holsa nian.
Notísia relevante: PNTL Bobonaro halo apreensaun ba motorizada-karreta 30 iha Holsa
Jornalista: Sérgio da Cruz
Editór: Evaristo Soares Martins
