PNTL Bobonaro halo apreensaun ba motorizada-karreta 30 iha Holsa
BOBONARO, 08 marsu 2023 (TATOLI) – Polísia Nasionál Timor-Lest (PNTL) munisípiu Bobonaro liuhosi seksaun tránzitu rodoviáriu, halo atividade pasa-revista iha dalan públiku konsege halo apreensaun ba motorizada 30-resin ho karreta mikorlete ida iha sede área estrada públiku sede suku Holsa, postu administrativu Maliana.
Notísia relevante: Viola kódigu estrada, PNTL Bobonaro halo apreensaun ba motór 21
“Ita-nia operasaun cek point halo iha Holsa, ita konsege prende (halo apreensaun) 30-resin, sira halo infrasaun hanesan la uza kapasete, dokumentu inválidu ona ho asesór balun la kompletu, espellu no lampu no balu karta kondusaun mate no seidauk iha,” Xefe seksaun tránzitu pólisia munisípiu Bobonaro, Sarjentu Xefe Joao Belo, informa ba Jornalista sira, iha Maliana, kuarta ne’e.
Sarjentu Xefe ne’e akresenta, cek-poin ho Swiping ida-ne’e nu’udar planu operasaun tránzitu nia bazea ba despaxu orientasaun hosi komadante polísia komandu munisípiu Bobonaro, Superintendenti Antoninho Mauluta.
“Ita-nia planu operasaun ne’ebé mak iha, ita realiza hahú fulan-fevereiru até agostu ne’e signifika katak ita la para, maibé ita la determina tempu ho oras no data, tanba ami polísia tránzitu ami servisu 24 oras, tanba ami-nia atendimentu ba sidadaun sira-ne’ebé hetan asidente no insidente laiha rezerva,” nia katak.
Xefe seksaun tránzitu munisípiu ne’e akresenta, iha atividade auto-top ne’e tau atensaun prioridade liu ba estudante sira, tanba hanesan ema edukadu ida sira tenke aprende barak atubele sai sidadaun ida-ne’ebé di’ak bainhira kondús karreta ho motorizada.
“Daudaun ita-nia komunidade sira barak, tanba deit osan iha sosa motor (motorizada) balun rua no tolu iha uma, maibé sira seidauk komprende didi’ak utilizasaun veíkulu, nbainhira liu iha estrada públiku,” nia fó hanoin.
Atu konsiensializa utente rodoviáriu sira kumpre regra tránzitu bainhira movimenta ba-mai iha estrada públiku, dadaun ne’e seksaun tránzitu munisípiu Bobonaro sosializa dekretu-lei kódigu estrada no sinál tránzitu ba estudante iha eskola sekundáriu Koléjiu Palaka, suku Batugade, Tékniku Vokasionál númeru II Malibaka Yamato, Maliana, Teknika Imformátika (IT) Maliana.
Enkuantu iha loron-kuarta, 08 marsu ne’e realiza iha Eskola Sekundária Jerál (ESG) númeru I Dom Martinho da Costa Lopes Maliana, no tuir planu kinta ne’e realiza mós iha eskola Cristal no eskola seluk tán ne’ebe eziste iha munisípiu Bobonaro.
Notísia relevante: PNTL Bobonaro halo apreensaun ba Kuda no mina ilegál litru 455
Jornalista: Sérgio da Cruz
Editór: Evaristo Soares Martins
