PNTL Bobonaro halo apreensaun ba Kuda no mina ilegál litru 455
BOBONARO, 18 jullu 2022 (TATOLI) – Komandu Polísia Nasionál Timor-leste (PNTL) Munisípiu Bobonaro, halo apreensaun ba Kuda no Gazolina hamutuk litru 455 ne’ebé sidadaun sira hatama ilegál hosi Atambua, Belu, Provínsia Nusa Tengara Timur (NTT), Repúblika Indonezía mai territóriu Timor-Leste.
Komandante PNTL Munisípiu Bobonaro, Superintendente Antoninho Mauluta, informa, objetu ilegál hirak-ne’e ekipa konjunta komposta hosi PNTL munisípiu Bobonaro, Unidade PatruLlamentu Fronteira (UPF) no Servisu Informasaun Polísia (SIP) halo apreensaun iha suku Tapo-Memo, postu administratrivu Maliana.
“Ita-nia membru sira halo operasaun konsege kapura ema hatama mina ilegál hosi mota sorin, sira halo apreensaun ba Gazolina hamutuk Jerigen 13 ho totál litru 455, ne’e mak hosi UPF sira halo guia entrega mai komandu,” nia informa ba Jornalista sira iha suku Manapa, postu administrativu Cailaco, segunda ne’e.
Nia dehan, seksaun investigasaun komandu munisípiu Bobonaro halo ona prosesu identifikasaun ba sasán na’in inklui objetu no dadaun prepara ona submete ba Ministériu Públiku.
“Sasan sira hanesan kumbustível ne’e oras ne’e ami asegura hela iha komandu munisípiu, ita sei hein lai tanba ninia prosesu la’o hela,” nia hatutan.
Nune’e mós iha loron-domingu, 17 jullu ne’e PNTL eskuadra Bobonaro konsege halo apreensaun ba Kuda hamutuk haat ne’ebé sidadaun sira tula iha kamioneta ida deskonfia tula ba fronteira Lebos, postu administrativu Lolotoe atu ba fa’an iha Atambua, Timor Osidentál.
Maibé Komandante ne’e dehan daudaun ne’e parte investigasaun sei halo prosesu identifikasaun ba Kuda-na’in tanba fornese informasaun ba autoridade seguransa la bazea ba realidade ne’ebé akontesse.
Mauluta haktuir, tuir informasaun ne’ebé nia parte simu liuhosi telefónika hosi eis xefe suku Mali-Ubu, katak Kuda refere nia parte hamutuk ho eis administradór postu administrativu mak sosa atu lori halo lia iha Hauba.
“Kuda-na’in pasa informasaun mai hau kuda ne’e atu lori mai rai temporáriu iha eis xefe suku Oeleu nia uma depois Lia ne’e akontese mak sira atu ba foti iha Oe-eleu, maibé depois ha’u-nia membru sira hosi eskuadra Bobonaro infroma mai dehan kuda ne’e loloos kapura tula hosi diresaun Hauba atu ba Lebos hodi halo tranzaksaun ilegál,” nia akresenta.
Nune’e seksaun Investigasaun halo hela prosesu identifikasaun ba Eis Xefe suku Oe-leu ho motorista ne’ebé lori kamioneta ne’e rasik atubele hatene verasidade hosi informasaun ne’ebé parta rua ne’e sosa no fa’an.
Jornalista : Sérgio da Cruz
Editór : Evaristo Soares Martins
