DILI, 08 novembru 2023 (TATOLI) – Ministru Juventude Desportu Arte no Kultura (MJDAK), Nélio Isaac Sarmento, dehan Governu Xina hakarak apoia Timor-Leste (TL) iha área desportu, nomeadamente apoia fasilidade ba atleta timoroan.
“Agora ita halo ona diskusaun téknika, agora Xina iha ona vontade atu koopera ho Governu Timor-Leste liuhosi MJDAK atu bele haree kondisaun ne’ebé mak ita sei husu ba sira mak oinsa atu sira bele ajuda ita iha fasilidade desportu”, Ministru Nélio ba Agência TATOLI iha Palásiu Governu, ohin.
Fasilidade ne’ebé Governu identifika ona atu husu Xina hodi nia apoia mak kampu futeból, voleból, basketból no fasilidade seluk tan ne’ebé ligadu ho desportu.
“Bainhira parte rua iha ona koordenasaun mak Governu Xina foin iha desizaun sira atu apoiu ho mekanismu oinsa, sira mak finansia hotu mai atu hadia kampu sira ita temi ne’e ka sira atende sorin no Governu Timor-Leste sorin, ida-ne’e hein desizaun hosi diskusaun ne’ebé ita halo hela ho sira”, nia hatete.
Fasilidade desportu iha Timor-Leste, daudaun ne’e, seidauk iha kondisaun ne’ebé sufisiente ba atleta sira atu uza hodi tuir treinamentu, hosi dezafiu ne’e afeta mós ba partisipasaun atleta sira iha eventu rejionál no internasionál.
Jornalista: Hortencio Sanchez
Editór : Zezito Silva
