DILI, 11 novembru 2023 (TATOLI) – Juventude Movimentu Jerasaun Loos Nasaun Di’ak (JMJLND) servisu hamutuk ho Kruz Vermella Timor-Leste no Banku Nasionál de Sangue hala’o atividade doasaun ran atu ajuda ema moras iha Ospitál Nasionál Guido Valadares (HNGV).
“Loron ohin ne’e importante atu komemora loron nasionál Juventude, tanba ne’e ami husi movimentu oferese raan hodi bele ajuda maluk sira ne’ebé presiza raan”, hatete Koordenador Juventude Movimentu Jerasaun Loos Nasaun Di’ak, Elizito Ximenes, iha Pantai Kelapa.
Nia hateten movimentu besik ema atus ida mak hakarak atu oferese raan ba iha Banku Nasionál de Sangue.
Iha fatin hanesan, Membru JMJLND, Óscar Ximenes, reforsa hakarak fó nia raan ba iha Banku Nasionál de Sangue atubele ajuda ema sira ne’ebé moras urjente.
“Ha’u hanesan juventude oferese raan ne’e ba banku de sangue hodi ajuda ema seluk ne’ebé presiza raan, tanba ema balun moras presiza hein família atu hasai raan, entaun ida ne’e fasil ona hodi foti hodi tulun ema seluk. Ida ne’e hanesan kontribuisaun ida ba HNGV”, nia dehan.
Nune’e, nia husu ba joven hotu-hotu ne’ebé iha kondisaun saúde di’ak bele oferese sira nia raan ba iha banku de sangue hodi bele tulun ema seluk iha ospital.
“Ita labele husik ita nia raan iha ita nia isin lolon de’it, maibé presiza fó atu ajuda ema seluk”, nia husu.
Entretantu, Xefe Departamentu Banku Nasionál de Sangue HNGV, Claúdio Quintão, dehan banku de sangue presiza raan atu bele ajuda moras sira ospital.
“Fulan ida ne’e instituisaun barak mak hakarak fó raan ba iha Banku Nasionál de Sangue. Atividade ne’e ita bele garante ona estoke ba iha banku de sangue hodi suporta ema moras sira”, nia dehan.
Jornalista: Jesuína Xavier
Editór : Florencio Miranda Ximenes
