Elvino Belo manán iha suku Tirilolo ho votu 1.829
BAUCAU, 14 novembru 2023 (TATOLI) – Rezultadu apuramentu hosi suku Tirilolo, postu administrativu Baucau Vila rezulta kandidatura ho númeru sorteiu ida Elvino Freitas Belo manán ho votu 1.829.
Hosi rezultadu apuramentu, totál taxa partisipasaun hamutuk rihun 3.626, komposta hosi suku Tirilolo votu nulu hamutuk 36, branku tolu no votu válidu hosi aldeia Betulale hamutuk 1.111, Caisido 459, Lialailesu 272, Lutumutu 1.225, Osso-ua 340 no Parlamentu hamutuk 219.
Hosi votu totál eleitór hirak-ne’e, kandidatura númeru sorteu ida Elvino Freitas Belo sai vensedór dahuluk ho totál votu hamutuk 1.829, enkuantu atuál xefe suku Ricardo Ernesto Belo ho totál votu 1.758.
Prezidente Meza Asemblea Suku, Manuel Freitas, esplika, mesmu nune’e hosi rezultadu apuramentu suku Tirilolo mosu reklamasaun hosi kandidatura xefi suku númeru sorteu rua tanba deskonfia mosu manipulasaun akta aldeia.
Manuel Freitas, argumenta, kandidatura Ricardo Belo konsidera, nia parte halo reklamasaun tanba bainhira kontazem votu iha aldeia Lutumutu deskonfia aumenta votu iha akta ba kandidatura Elvino Belo nune’e konsellu suku deside kontinua ba postu adminsitrativu Baucau vila atu deside.
“Kandidatura númeru sorteiu rua mak dúvida ho akta rezultadu aldeia Lutumutu nune’e halo reklamasaun to’o postu,” Manuel Freitas hateten ba Agência TATOLI iha Vila Antiga, tersa ne’e.
Prezidente meza asemblea suku hateten, nia parte labele loke fali boletín votu atu halo kontajen foun tanba lei-númeru 9/2016 kona-ba kompeténsia meza ho válida de’it akta hosi aldeia, enkuantu mosu reklamasaun tenki rezolve iha postu admistrativu.
Jornalista : Natalino Belo
Editór : Evaristo Soares Martins
