DILI, 13 novembru 2023 (TATOLI) – Marcelino Soares, xefe suku Fatuhada iha périodu 2016-2023, re-eleitu sai xefe suku ba périodu daruak, hahú 2023-2030; tinan hitu.
Molok re-eleitu ba xefe suku Fatuhada antes ne’e kompete ho kandidatu Xefe suku Fatuhada na’in sia sira seluk iha primeira ronde ne’ebé halo tiha ona iha 28 outubru 2023 liubá.
Ho nune’e rezultadu hatudu katak laiha kandidatu ida maka ho votu barak liu 51+ entaun entre sira na’in sia ne’e, na’in rua mak hetan votus balansu mak Xefe suku tuan, Marcelino Soares ho kandidatu Xefe suku foun, Sérgio da Silva Moreira.
Bazea ba rezultadu ne’e, ohin, sira na’in rua mak kompete iha eleisaun Xefe suku Fatuhada iha segunda ronde no hatudu katak maioria populasaun Fatuhada hili Xefe suku tuan, Marcelino Soares. Ho konfiansa ne’ebé depozita husi komunidade sira, kandidatu Marcelino Soares, re-eleitu ba Xefe suku Fatuhada, iha périodu 2023 – 2030.
Marcelino Soares re-eleitu ho votu hamutuk 3.465 kompara ho kandidatu Sérgio hetan deit votus 2.000-resin
Eleisaun Xefe suku ba Segunda ronde ida ne’e realiza iha Sentru votasaun eskola 10 Dezembru no partisipa másimu husi populasaun Suku Fatuhada ho hakmatek, displina no la forma naruk kompara hanesan eleisaun primeira ronde.
Eleisaun Xefe suku ida ne’e asegura másima husi autoridade seguransa hanesan Polísia Nasionál Timor – Leste (PNTL).
Xefe suku eleitu, Marcelino Soares ba jornalista TATOLI, agradese ba votus konfiansa ne’ebé povu fó no promote sei serbisu ho governu hodi tau-matan ba povu tomak iha Fatuhada.
“Obrigadu barak ba votus konfiansa mai ha’u. Ha’u sei kontinua serbisu hamutuk ho Estadu no Governu hodi aselera dezenvolvimentu suku. Alende ne’e mós, sei tau-matan ba asuntu sosiál no administrasaun suku ba Povu Suku Fatuhada tomak,” nia kompromete.
Jornalista: Camilio de Sousa
Editór: Rafael Ximenes de A. Belo
