HoREX Baucau rejista pasiente HIV-SIDA 32
BAUCAU, 16 novembru 2023 (TATOLI) – Hospital Rejionál Eduardo Ximenes munisípiu Baucau rejista pasiente sofre moras HIV-SIDA hamutuk na’in-32 ne’ebé kontinua halo tratamentu iha Baucau.
Konsellór HIV-SIDA HoREX Baucau atuál enfermeiru, Sabino de Carvalho, relata infromasaun refere bainhira partisipa semináriu kona-ba refreshing tranning ba tékniku laboratóriu teste HIV/SIDA organiza hosi diresaun programa nasionál HIV-SIDA, Ministéiru Saúde ne’ebé realiza durante loron-rua hosi kuarta to’o kinta, 15-16 fulan novembru.
“Sira sei kontinua halo tratamentu iha HoREx Baucau,” Konsellór HIV-SIDA HoREX Baucau hateten iha Vila Nova, kinta ne’e.
Pasiente na’in-32 hirak-ne’e komposta hosi joven feto no mane inklui kazada no labarik na’in-rua no adultu na’in-30 ne’ebé maihosi munisípiu tolu hanesan Manatuto na’in-ida, Lautém na’in-haat no na’in-27 hosi munisípiu Baucau.
Hosi pasiente hirak-ne’e kauza moras maihosi relasaun seksuál ne’ebé hada’et mós ba labarik na’in-rua tanba maioria pasiente sira seidauk iha koñesementu kle’an kona-bá edukasaun reprodutiva liuliu relasaun seksuál.
Sabino de Carvalho, konsidera liuhosi semináriu ne’ebé hala’o importante tanba bele aumenta koñesementu tékniku kona-ba lala’ok identifikasaun iha laboratóriu liuliu serbisu hamutuk entre tékniku no konsellór tanba bele deteta risku hosi moras HIV-SIDA ba kada pasiente sira.
“Liuhosi semináriu ne’e sai oportunidade atu hadi’a di’ak liután kona-bá atendimentu pasiente HIV-SIDA iha Baucau,” Sabino Carvalho akresenta.
Supervizór rejonál atuál koordenadór peskiza nasionál programa HIV-SIDA hosi Ministéiru Saúde, Silvestre da Costa Sarmento, hateten, dadus atuál to’o fulan-setembru MS rejista pasiente sofre moras HIV-SIDA hamutuk 2.050 ne’ebé maioria pasiente idade hosi 25-44 korresponde pursentu 55 ne’ebé munisípiu Dili mak okupa tabela dahuluk, tuir kedas Bobonaro, Covalima, RAEOA no Baucau.
“Agora barak mak sei espalla iha Timor no pursentu 51 mak kontinua halo tratamentu iha fasilidade saúde sira,” Silvestre Sarmento hateten.
Jornalista : Natalino Belo
Editór : Evaristo Soares Martins
