DILI, 20 novembru 2023 (TATOLI) — Vise Primeiru–Ministru no Ministru Koordenadór Asuntu Ekonomia no Ministru Turizmu no Ambiente hala’o lansamentu ba Programa Nasionál “Ha’u-nia tasi no ha’u-nia Timor”, iha BJ Habibie Bidau Santana.
“Atividade lansamentu ida-ne’e inisiativa mai husi Ministériu Turismu no Ambiente atu hahú sosializa no ita hotu tenke konsiensializa katak ita-nia tasi ne’e mak ita-nia rikusoin”, Francisco Kalbuadi Lay informa iha nia diskursu.
Tuir nia, Governu sei kontinua halo kampaña kona-ba Programa Nasionál “ha’u-nia tasi no ha’u-nia Timor”, ho objetivu atu sensibiliza komunidade sira kona-ba área maritíma iha Timor-Leste no sei fó mós prioridade ba elaborasaun Polítika ba Ekonomia Azul iha Timor-Leste hodi krese ekonomia sustentavel ba nasaun.
Tanba ne’e, nia husu atu kuidadu tasi atu nune’e bele proteje ambiente sira iha tasi laran hodi bele garante ekonomia di’ak ba nasaun.
Iha fatin hanesan, Vise Primeiru-Ministru no Ministru Dezenvolvimentu Rurál no Habitasaun Komunitaria, Mariano Asanami Sabino, husu ba povu sira atu proteje ikan sira no rikusoin iha tasi laran hodi bele fó impaktu di’ak ba ekonomia Timor-Leste nian.
“Ita tenke promove ita-nia tasi no promove ita-nia rikusoin tasi no mós proteje animál oioin iha tasi laran nune’e bele fó ekonomia di’ak, tanba ne’e ita hotu fó apoiu ba malu atu la’o nafatin”, ni konklui.
Jornalista : Felicidade Ximenes
Editór : Zezito Silva
