CVTL realiza formasaun jestaun dezastre naturál iha Baucau
BAUCAU, 21 novembru 2023 (TATOLI) – Kruz Vermella Timor-Leste (CVTL, sigla Portugés) tersa ne’e, realiza formasaun kona-ba jestaun dezastre naturál iha munisípiu Baucau.
Jestór Responde Emerjénsia CVTL, Filomeno de Araújo, esplika, atividade refere hala’o durante loron-haat, hahú ohin no sei remata iha loron-sesta, 24 novembru ho objetivu atu kanaliza informasaun hotu kona-ba jestaun dezastre nune’e iha koñesementu oinsá atu prevene bainhira akontese dezastre naturál iha komunidade.
“Kuandu iha ona koñesementu hanesan entaun mosu dezastre naturál bele ona fó apoia emerjénsia ka atuasaun ne’ebé lais no rápidu ba ita-nia komunidade,” Jestór responde emerjénsia CVTL hateten iha Vila Nova, tersa ne’e.
Materiá ne’ebé partisipante sira hetan durante formasaun refere mak hanesan koordenasaun, planu operasionál, levantamentu dadus, jestaun kampu, prosesu distribusaun ajudu ba vítima sira.
Alende ne’e, matéria seluk mak koordenasaun ba família vítima ne’ebé lakon inklui jestaun ba vítima mate no protesaun ba jéneru inkluzaun nune’e prevene kona-ba deskriminasaun atuasaun hasoru vítima sira.
“Matéria sira-ne’e mak ita fó ba formandu sira,” Filomeno de Araujo akresenta.
Diretór Serbisu Munisipál Protesaun Sivíl no Dezastre Naturál Baucau, Nelson Nunes, hateten, formasaun refere importante tanba bele kapasita membru konsellu protesaun dezastre naturál munisípiu Baucau, liuliu kona-ba jestaun ba molok no depois mosu dezastre naturál.
“Ida-ne’e aumentu koñesementu ba membru sira nune’e bele halo intervensaun iha terrenu,” Nelson Nunes hateten.
Nelson Nunes husu formandu sira atu aproveita liuhosi formasaun refere durante loron-haat ho di’ak tanba nu’udar oportunidade atu dezenvolve no kapasita aan hodi serbí komunidade liuhosi dalan prevensaun dezastre naturál iha munisípiu Baucau.
Partisipa iha atividade formasaun refere maihosi membru konsellu munisípiu dezastre naturál Baucau ne’ebé kompostu hosi CVTL Baucau, Diresaun Protesaun Sivíl no Dezastre Naturál, Autoridade Protesaun Sivíl no Bombeiru hamutuk na’in-25.
Jornalista : Natalino Belo
Editór : Evaristo Soares Martins
