DNSM sosializa papél Migrasaun iha Baucau
BAUCAU, 21 novembru 2023 (TATOLI) – Diresaun Nasionál Serbisu Migrasaun (DNSM), Ministériu Interior (MI) tersa ne’e, sosializa lei-númeru 10/2021 kona-ba papél Migrasaun iha munisípiu Baucau.
Xefe Administrasaun Serbisu Migrasaun, Júlio Abílio de Sá, esplika, atividade refere hala’o atu sosializa lei-númeru 10/2021, alterasaun dahuluk lei-númeru 11/2017 kona-ba lei migrasaun azilu ho objetivu atu partilla informasaun papél Migrasaun ba komunidade ho tarjetu autoridade lokál, sosiedade sivíl no emprezáriu.
“Ita hakarak partilla informasaun ba komunidade sira atu intende papél Migrasaun ho loloos tanba dalaruma komunidade sira iha área seidauk komprende serbisu Migrasaun,” Xefe Departamentu Administrasaun serbisu migrasaun hateten iha Vila Antiga, tersa ne’e.
Bainhira falta informasaun dalaruma komunidade dúvida ho kontrola prezensa sisadaun estranjeiru iha Timor-Leste ne’ebé deskonfia halo serbisu ilegál liuliu pasa informasaun hosi komunidade liuhosi koordenasaun entre autoridade seguransa hanesan Ofisiál Polísia Suku (OPS) ba komandu munisípiu antes serbisu migrasaun halo operasaun.
Serbisu Migrasaun durante ne’e simu informasaun hosi Polísia Nasionál Timor-Leste (PNTL) kona-ba deskonfia mosu atividade ilegál no serbisu migrasaun halo investigasaun nune’e bainhira deteta komete erru sei fó sansaun tuir lei migrasaun nian.
“Sosialiazaun foin mak hahú iha inísiu tinan-ne’e no tarjetu ba munisípiu sira-ne’ebé dook hosi fronteira,” Júlio de Sá akresenta.
Atividade refere hala’o fahe ba faze daruak hanesan dahuluk iha Atauro, Dili, Aileu, Ainaro no Same. Enkuantu faze daruak hahú ho Baucau no sei kontinua iha Lautém, Viqueque no remata iha munisípiu Manatuto.
Jornalista : Natalino Belo
Editór : Evaristo Soares Martins
