Veteranu na’in-188 hosi Baucau sei simu kondekorasaun iha 28 Novembru

BAUCAU, 23 novembru 2023 (TATOLI) – Veteranu kombantente libertasaun nasionál hamutuk na’in-188 hosi munisípiu Baucau sei simu medalla kondekorasaun iha komemorasaun loron Restaurasaun Unilaterál Independénsia 28 novembru tinan-ne’e.

Sekretáriu Jerál Konsellu Munisipál Kombantente Libertasaun Nasionál (CMCLN, sigla Portugés) Baucau, Manuel ‘Alari’ da Costa Soares, esplika, númeru hirak-ne’e aprova hosi nasionál no liuhosi faze verifikasaun iha baze hanesan sekretáriu zona iha postu administrativu no hetan aseitasaun iha Konsellu Veteranu Baucau.

“Tinan-ne’e ami fokus de’it ba grau III tanba grau I no II sei hadi’a lai depois sei atribui fali tanba bazea ba instrusaun hosi Prezidente CMCLN Baucau,” Sekretáriu Jerál CMCLN Baucau hateten iha Vila Antiga, kuarta ne’e.

Hosi 188 ne’e sei atribui tuir kategória grau III tanba grau II no I sei kontinua iha faze verifikasaun tanba maioria seidauk prienxe rekizitu bazea ba tinan kontribuisaun luta ukun rasik aan.

Medalla kondekorasaun ne’ebé sei atribui ba kombatentes grau III bazeia ba tinan luta hosi 8-14 no 4-7 bazea ba pozisaun estrutura durante luta gerillia iha ai-laran.

“Bainhira halo rejistu no aprezenta faktu kona-ba partisipasaun luta nune’e sei atribui bazea ba tinan inklui pozisaun,” Alari akresenta.

Serimónia kondekorasaun iha Baucau sei hala’o iha loron-27 novembru ne’ebé sei reprezenta hosi nasionál liuhosi Ministru Defeza, Pedro Klamar Fuik hodi atribui medalla kondekorasaun ba veteranu ne’ebé mai hosi postu administrativu neen hamutuk 188. Medalla kondekorasaun refere tipu rua hanesan orden Nicolau Lobato no orden gerillia.

Jornalista   : Natalino Belo 

Editór         : Evaristo Soares Martins