Eskola Prezidente Nicolau Lobato Soibada menus manorin inglés
DILI, 24 novembru 2023 (TATOLI)—Eskola Sekundáriu Prezidente Nicolau Lobato Soibada, munisípiu Manatuto, menus manorin ka profesór dixiplina Inglés tanba manorin Adérito da Costa ne’ebé uluk hanorin dixiplina Ingles ne’e fila hikas ona ba Maromak nia uma.
Diretór Eskola Sekundária Prezidente Nicolau Lobato Soibada, Joanico da Costa, husu IX Governu Konstitusionál liuhosi Ministériu Edukasaun (ME) atu toma atensaun tanba manorin ba dixiplina inglés laiha.
“Ida-ne’e lori problema ba eskola Sekundária Prezidente Nicolau Lobato, apezar manorin ne’ebé menus hela entaun hosi Adérito da Costa nia mate ne’e sei menus liután. Entaun husu Governu rekruta manorin iha 2024,” Diretór eskola ne’e hateten liuhosi WhatsApp, ba Agência Tatoli, sesta ne’e.
Tanba, tuir nia, dixiplina inglés ne’e língua Internasionál no dixiplina ne’e tama mós iha ezame nasionál, nune’e husu atu tau atensaun no importante tebes manorin ba inglés iha eskola refere.
Matebian Adérito da Costa ne’e hanorin dixiplina inglés iha Eskola Sekundária Prezidente Nicolau Lobato no mós sai reponsável ba désimu primeiru ano iha eskola tékniku vokasionál Soibada nian.
“Eskola Sekundária Prezidente Nicolau Lobato Soibada sente triste no lakon nia manorin ida matenek ne’ebé durante ne’e lori dixiplina inglés. Eskola hamutuk ho nia diretiva tomak, alunu no alumni, sente lakon tebes,” nia dehan.
Matebian hakotu iis iha Hospital Nasionál Guido Valadares (HNGV, sigla Portugés) ho moras komplikadu.
Manorin iha Eskola Sekundáriu Prezidente Nicolau Lobato Soibada hamutuk na’in-13 kompostu hosi feto haat (4) no mane sia (9) ho nia estudante hamutuk 118.
Jornalista : Osória Marques
Editór : Cancio Ximenes
