iklan

NASIONÁL, EKONOMIA, DILI, HEADLINE

MKI realiza eventu karavana artístika hodi promove kultura no turizmu

MKI realiza eventu karavana artístika hodi promove kultura no turizmu

Imajen Tatoli/Jesuína Xavier

DILI, 24 novembru 2023 (TATOLI) – Ministériu Komérsiu no Indústria (MKI), sabádu (25/11), realiza eventu karavana artístika 2023 husi Tasi Tolu to’o Largo Lecidere hodi promove talentu joven-sira, kultura no turizmu iha Timor-Leste.

Atividade Karavana Artístiku ho tema “Haburas no dezenvolve rai doben Timor-Leste” 2023 ne’e partisipa direta hosi grupu kulturál no joven talentu sira hamutuk 30 husi munisípiu hotu inklui sosiendade sívil.

“Objetivu husi karavana atu fó oportunidade ba joven no sosiedade sivíl sira atubele aumenta sira nia kapasidade iha ideia inovativu no talentu bele anima komunidade no promove mós ita nia kultura”, Diretór Jeral Turizsmu MKI, Jelino Soares, hatete liuhosi Konferénsia impresa, Lecidere-Dili.

Nia dehan iha eventu mós sei partisipa direta hosi investór sira ne’ebé partisipa iha forum internasionál ba negósiu atubele koñese kultura no deskobre oportunidade investimentu ne’ebé iha liuliu setór turizmu no agrikultura.

“Grupu karavana sira sei hala’o aprezenta ho kompetitivu tanba sei halo selesaun ba manán na’in ne’ebé iha kualidade liuhosi iha eventu karavana”, nia afirma.

Karavana artístiku ne’e realiza tanba hetan fundu hosi Governu liuhosi MKI ho totál rihun $90.

Iha fatin hanesan, Xefe Sesaun Tránzitu Munisípiu Díli Polísia Nasionál Timor-Leste (PNTL), Afonso da Silva, hatete, PNTL sei garante eventu karavana artísitku hodi taka dalan husi Tasi-Tolu to’o mai Lecidere durante horas rua.

“Apelu ba públiku katak tránzitu sei taka dalan iha tuku rua lokoraik husi uma adat Tasi-Tolu to’o Largo-Lecidere. Asaun taka dalan ba públiku atu bele garante eventu karavana la’o ho susesu. Nune’e ami husu ita bo’ot sira nia-komprensaun durante oras rua nia laran. Bainhira karavana liu, ami sei loke dalan”, nia apela.

Jornalista: Jesuína Xavier

Editór     : Florencio Miranda Ximenes

iklan
iklan

Leave a Reply

iklan
error: Content is protected !!