SEFOPE sensibiliza Lei Seguransa Saúde Ijiene ba emprezáriu no traballadór iha Baucau
BAUCAU, 24 novembru 2023 (TATOLI) – Governu liuhosi Sekretaria Estadu Formasaun Profisionál no Empregu (SEFOPE) sesta ne’e, sensibiliza lei-númeru 11/2023 kona-ba Seguransa Saúde Ijiene ba emprezáriu no serbisu na’in-sira iha munisípiu Baucau.
Inspetór Traballu hosi SEFOPE, Rofindo Lopes, esplika, inportánsia sosializa (sensibiliza) lei refere hafoin entrada no vigór tanba presiza kontrola kona-ba prosesu implementasaun liuhosi inspesaun traballu hafoin lei refere prodús liuhosi aprovasaun iha Parlamentu Nasionál (PN) no publika iha Jornál Repúblika iha loron-19 fulan-abríl 2023.
“Iha lei ne’e hateten bainhira la implementa sei iha sansaun tuir grau gravidade iha infrasaun,” Inspetór Traballu SEFOPE hateten iha salaun apuramentu Vila Nova, sesta ne’e.
SEFOPE deteta antes lei refere prodús mosu infrasaun hanesan asidente iha fatin serbisu liuliu la utiliza ekipamentu protesaun, nune’e presiiza kontrolu tuir lei ligadu ho infrasaun tuir kategória hosi nível kiik, médiu no grave nune’e bele implementa penalidade tuir kategória gravidade.
Bainhira traballadór hetan asidente iha fatin serbisu, liuliu utiliza ekipamentu protesaun sei iha penalidade ba kompañia atu responsabiliza tuir kategória hahú hosi sansaun multa saláriu ba traballadór hanesan selu hosi fulan 5 to’o 10.
“Objetivu loloos atu fó protesaun ba traballadór no empregadór sira tanba ne’e presiza hato’o medida prevensaun tuir lei,” Rofindo Lopes akresenta.
Emprezáriu lokál Costa motor, Estanislau Maria Quintas da Costa, konsidera sensibilizasaun lei refere inportante tanba aumenta koñesementu kona-bá lala’ok serbisu entre traballadór ho emprezáriu sira durante halao serbisu iha terrenu.
“Atu traballadór no emprezáriu sira presiza atu kumpri hodi implementa iha fatin serbisu tuir lei ne’e,” Estanislu da Costa hateten.
Partisipa iha sensibilizasaun lei-númeru 11/2023 loron 19 fulan-abríl kona-ba seguransa saúde ijiene ba emprezáriu no serbisu nain sira partisipa hosi autoridade munisípiu, emprezáriu lokál no traballadór sira sira iha munisípiu Baucau.
Jornalista : Natalino Belo
Editór : Evaristo Soares Martins
