Governu prevee millaun $3-resin atu konstrui ponte foun iha Casnafar

DILI, 26 novembru 2023 (TATOLI) – IX Governu Konstitusional prevee ona orsamentu ho montante $3.632.896.18 atu hadi’a ponte foun ida iha Casnafar hodi tulun komunidade sira iha suku Bokolelo no suku Dare, postu administrativu Laulara, munisípiu Aileu no postu administrativu Vera Cruz, munisípiu Dili atubele fasilita movimentasaun.

Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, ne’ebé hetan akompañamentu husi Ministru Obra públiku no Ministru Planemanetu halo ona lansamentu fatuk dahuluk ba kontrusaun ne’e hodi garante katak ba tinan oin ponte ne’e bele finaliza ona atu nune’e komunidade sira bele lori sira-nia produtu fa’an iha merkadu.

ViSe PM ne’e hateten, durante tinan barak ema hotu tantu komunidade, Diretór sira mai to’o iha membru governu ne’ebé de’it ne’ebé maka utiliza área ne’e hodi hala’o atividade privadu ka atividade estadu no governu nian sempre hasoru obsákulu no dezafiu oinoin.

“Ita hotu-hotu durante ne’e liu ba liu mai ida fatin ne’e ita hotu hatene katak dalan ne’e sempre sai obstákulu boot ida ba ita hotu-hotu tanba kondisaun estrada ne’ebé aat tebes,” Kalbuady Lay, ko’alia iha serimónia lansamentu fatuk dahuluk ba konstrusaun ponte foun Casnafar daudaun ne’e.

Maibé nia dehan, agora ho mandatu IX Governu Konstitusionál nian ne’ebé lideradu husi Primeiru Ministru Kay Rala Xanana Gusmão nian ne’e buat hotu sei rezolve.

“Ha’u fiar liuhosi ita-nia ministru na’in-rua ne’ebé iha ona esperiénsia boot ne’ebé mai husi sira ninia lideransa iha uluk hanesan Ministru Obra Públiku no Diretór AND, ne’e ha’u fiar katak ba oin prosesu infraestrutura hanesan konstrusaun ponte ka estrada ne’ebé sira na’in rua kaer sei laiha problema,” tenik nia.

Xefe Suku Boklelo, postu administrativu Laulara, Januário Guterres de Deus Pereira lori komunidade suku rua ninia naran, agradese ba IX Governu lidera husi PM Xanana Gusmão tanba hatudu ona ninia domin hodi tau osan ba konstrusun ponte foun iha Casnafar ne’e.

“Ami agradese no liuhosi Vise Pirmeiru Ministru ninia prezensa mai lansa ona fatik dahuluk ne’e, se bele tenke aselera konstrusaun ne’e atu komunidade sira bele uza hodi hala’o sira-nia atividade,” nia katak.

Enkuantu ponte foun Casnafar ne’ebé naruk metru 70 ne’e tuir planu sei kontrui iha inísiu 2024 no tuir tarjetu molok fim do ano tenke finaliza ona.

Jornalista: Tomé Amado

Editór: Evaristo Soares Martins