DILI, 29 novembru 2023 (TATOLI)—Banco Nacional Ultramarino (BNU), kuarta ne’e, lansa karreta movel hodi fasilita komunidade bainhira hakarak loke konta bankária no fasilidade finanseira seluk.
“Ida-ne’e investimentu foun ne’ebé mak BNU halo atu ajuda ninia servisu, tanba iha kliente balun ne’ebé mak iha difikuldade atu desloka ba banku, entaun BNU kria fasilidade ida-ne’e atubele desloka ba to’o kliente nia fatin, iha ne’ebá nia bele presta servisu hanesan mós servisu sira ne’ebé mak halo diretamente iha balkaun banku,” Koordenadór Área Ativa Banco Nacional Ultramarino (BNU), Egino Celestino da Costa Belo, informa ba Agência Tatoli, iha ámbitu selebrasaun loron poupansa nasionál ba dala-sia no loron kampu dijitál ba dala-tolu, iha resintu Timor Plaza, kuarta ne’e.
Notísia relevante : Governu no BNU selebra akordu atribui kartaun kréditu viza ba entidade Estadu 89
Karreta movel ne’e komunidade bele utiliza hodi loke konta bankária, internet banking, kartaun visa, kartaun déditu baibain, pedidu ba kréditu, no bele asesu ba produtu banku sira seluk.
Koordenadór ne’e iha esperansa katak ho karreta movel ne’e BNU bele desloka ba fatin sira ne’ebé mak ninia prezensa seidauk iha.
“Liuhosi atividade espozisaun sira ne’e públiku bele hakbesik-an ba ajénsia BNU atu hetan produtu sira ne’ebé BNU kria, fiar katak ema hotu koñese ona marka BNU maibé ninia produtu no servisu maka ema barak seidauk hatene, entaun presiza halo aprosimasaun no tun ba komunidade hodi desimina informasaun,” nia tenik.
Entretantu, iha karreta movel ne’e nia laran, kompleta ho fasilidade loke konta bankária no mákina Automated Teller Machine (ATM).
Daudaun BNU nia sukursál eziste ona iha munisípiu hotu, menus iha Manufahi no Ataúro.
Jornalista : Antónia Gusmão
Editora : Julia Chatarina
