iklan

OPINIAUN

”Veteranu sira tenke iha sentidu nasionalizmu no patriotizmu kontribui ba pás”

”Veteranu sira tenke iha sentidu nasionalizmu no patriotizmu kontribui ba pás”

Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, hasai fotografia hamutuk ho veteranu sira iha veteranu Ainaro, segunda (27 novembru 2023). Imajen/Mídia MAKLN.

DILI, 29 novembru 2023 (TATOLI)–Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, hateten veteranu sira hotu tenke iha sentidu nasionalizmu no patriotizmu hodi kontribui ba pás no estabilidade iha Timor-Leste.

“Husu ba veteranu sira atu kontribui ba pás no estabilidade iha ida-ida nia hela fatin. Veteranu labele hanoin de’it mak simu osan, veteranu sira tenke iha sentidu nasionalizmu no patriotizmu,”  Oan Soru hateten liuhosi komunikadu imprensa hafoin entrega medalla kondekorasaun ba vfeteranu sira iha segunda 927/11/2203) ne’ebé Agência Tatoli asesu, kuarta ne’e.

Tanba ne’e, veteranu ne’e nia kontribuisaun ba rai ida-ne’e, ida uluk no ida agóra, no ba oin saída mak tenke halo, dala ruma aman sira simu tiha medalla maibé sira rasik mak sai autór ba instabilidade.

“Ita rasik mak sai autór ba problema kria instabilidade ba rai ida-ne’e, tanba ne’e husu ba ita hotu-hotu no espesialmente ba sira-ne’ebé ohin simu kondekorasaun, ba ida-idak nia suku no aldeia, fó mós ita-boot sira-nia kontribuisaun ba autoridade sira, xefe aldeia, xefe suku, autoridade postu, autoridade seguransa hodi fó solusaun ba saída de’it mak akontese. Ida-ne’e mensiona iha artigu 34, iha estátutu kombatente libertasaun nasionál,” nia dehan,

Oan Soru hateten, kondekorasaun ne’ebé Estadu fó ba veteranu sira, hanesan valoriza sira-nia kontribuisaun ba ukun-rasik aan no kondekorasaun ne’e direitu kombatente libertasaun ne’ebe previstu iha lei.

Maibé, iha postu administrativu Hatubuiliku la marka prezensa iha komemorsaun loron proklamasaun indenpendénsia ba dala-48 iha munisípiu Ainaro, tanba ho razaun balun maibé MAKLN sei haree.

“Maibé ita sei haree iha tempu oin mai.  Hanesan ministru ba asuntu kombatente libertasaun nasionál haree tanba ha’u iha matan, ha’u mós sente tanba ha’u iha fuan. Ema balun dehan hanesan ne’e, ami hanoin ba simu osan, simu de’it medalla di’ak liu lalika bá, ha’u hatene ida-ne’e,” nia esplika.

Tanba, iha konstituisaun RDTL iha Artigu 11 (Fó valór ba Rezisténsia) iha alinea 1 hateten  Repúblika Demokrátika Timór-Leste rekoñese no fó valór ba povu Maubere nia rezisténsia tinan atus ba atus hasoru dominasaun hosi railiur no mós ba sira hotu ne’ebé fó kontribuisaun hodi luta ba independénsia nasionál.

Iha alinea 2 haktuir, Estadu rekoñese no valoriza Uma Kreda Katólika nia partisipasaun iha prosesu ba libertasaun nasionál Timór-Leste nian.

Alinea 3 hateten, Estadu asegura protesaun espesiál ba mutiladu funu nian, oan-kiak no mós sira seluk tan ne’ebé fó-an tomak ba luta independénsia no soberania nasionál nian, no proteje mós sira hotu ne’ebé partisipa ona iha Rezisténsia hodi hasoru okupasaun hosi raiseluk, tuir lei haruka, no alinea 4 haktuir Lei mak define kona-ba mekanizmu atu fó omenajen ba asswa’in nasionál sira.

Kondekorasaun ne’e atribui tuir grau, ne’ebé kompostu hosi kondekorasaun orden gerilla na’in-ualu (8) mak Ordem FALINTIL na’in-rua (2), Ordem funu na’in-193 no ordem Nicolau Lobato hamutuk 690.

Kondekorasaun ne’e públika hosi prezidente repúblika José Ramos Horta, no ba tinan ne’e veteranu postu administrativu tolu (3) mak simu kondekorasaun, kompostu hosi postu administrativu Ainaro, Maubise no Hatudu hamutuk 108 maibé ida prezente ne’e hamutuk 73 no auzente ne’e iha 31.

Jornalista  : Osória Marques

Editór         : Cancio Ximenes

iklan
iklan

Leave a Reply

iklan
error: Content is protected !!