Euan Marshall hasoru malu ho Xefe Estadu Ramos Horta
DILI, 30 novembru 2023 (TATOLI) – Country Manager International Finance Corporation (IFC) ba Indonézia no Timor-Leste Euan Marshall hala’o vizita dahuluk mai Timor-Leste no hasoru malu ho Prezidente Repúblika José Ramos Horta hodi ko’alia kona-ba prosesu dezenvolvimentu iha nasaun ne’e.
“Ha’u foin simu kna’ar foun hanesan Jestór foun iha IFC ba Indoézia ho Timor-Leste, ha’u mai dahuluk iha Timor-Leste atu buka hatene kona-ba dezenvolvimentu iha ne’e”, Euan dehan ba jornalista sira iha Palásiu Prezidensiál, ohin.
Nia dehan, diskusaun ne’e bele hasa’e ninia kontribuisaun ba dezenvolvimentu iha Timor-Leste tanba IFC nu’udar mós membru Banku Mundiál no bele kontribui ba Timor-Leste nia dezenvolvimentu.
“Iha diskusaun ne’e ha’u rasik mak foti esperansa boot ba Timor-Leste nia futuru tanba iha inisiativu lubuk ida ne’ebé pozitivu tebes tanba agora daudaun investór sira iha rai liur interesadu tebes hakarak mai investe, ida-ne’e sai hanesan sinál di’ak ida ba futuru Timor-Leste nian”, nia salienta.
IFC hanesan Agência finanseiru ida ne’ebé foka liu ba dezenvolvimentu setór privadu no interesadu kona-ba posibilidade atu investe iha Timor-Leste.
Jornalista: Hortencio Sanchez
Editór : Zezito Silva
