Sub KRAM husu organizasaun arte-marsiál kontinua kria pás iha Baucau
BAUCAU, 30 novembru 2023 (TATOLI) – Sub Komisaun Reguladora Arte-Marsiál (KRAM) husu ba organizasaun arte-marsiál sira kontinua kria pás no estabilidade iha munisípiu Baucau.
Prezidente Sub KRAM Baucau, Padre Justiano de Sousa, SDB, esplika, desizaun governu kona-bá suspensaun atividade organizasaun tolu hanesan PSHT, IKSPTL no KORK hato’o ona liuhosi enkontru nível nasionál iha KRAM nune’e munisípiu Baucau kontinua kumpre no simu orientasaun hodi kontinua hato’o ba kada organizasaun arte-marsiál hotu atu hala’o tuir nune’e bele kria pás no estabilidade iha Baucau.
“Suspensaun durante fulan-neen nune’e husu atu organizasaun tolu de’it maibé hotu-hotu atu hakmatek nune’e situasaun iha pás no estabilidade laran,” Prezidente Sub KRAM Baucau hateten iha Vila Antiga, kinta ne’e.
Sub KRAM Baucau liuhosi karta sirkulár hosi nasionál sei kontinua to’o iha postu administrativu sira atu halo fiskalizasaun kona-bá atividade deportiva refere hanesan estrutura, fatin formasaun no halo rejistrasaun.
KRAM Baucau tuir planu iha hahú loron 03 to’o 30 dezembru sei halo re-fiskaliza ba fatin formasaun hanesan fatin treinu, estrutura hosi munisípiu, postu to’o ranting hodi observa no foti dadus ligadu ho rekizitu hotu nune’e organizasaun ne’ebé seidauk prienxe rekizitu sei deside taka atividade.
Padre Justiano de Sousa, apela ba organizasaun arte-marsiál hotu-hotu atu hakmatek durante fulan-neen hodi kumpre desizaun governu nian liuliu labele utiliza uniforme organizasaun iha fatin publiku no halo movimentu hodi hein desizaun tuir mai.
“Ami koordena ona ho líder arte-marsiál hotu atu prontu no tenke kolabora ba programa governu nian, hein katak bele sai di’akliu,” Padre Justiano de Sousa akresenta.
Desizaun governu nian importante atu kumpri nune’e situasaun bele la’o hakmatek hikas antes atvidade kada arte-marsiál reativa fali tanba suspensaun ho objetivu atu halo disiplina membru inklui husu estrutura organizasaun sira-nia responsabilidade.
Desizaun suspensaun refere atu fó formasaun ba kada líder arte-marsiál inklui membru sira tanba governu konsidera nu’udar timoroan hotu ne’ebé futuru sai rekursu importante hodi partisipa iha prosesu dezenvolvimentu liuliu área desportu.
Governu liuhosi reuniaun Konsellu Ministru fó-sai rezolusaun númeru 45/2023, loron 10 fulan-novembru determinasaun suspensaun kona-bá ensinu aprendizajen no prátika arte-marsiál ho adosaun medida hodi asegura orden públiku.
Jornalista : Natalino Belo
Editór : Evaristo Soares Martins
