Baucau tenke unidade simu festa Natál
BAUCAU, 18 dezembru 2023 (TATOLI) – Autoridade Administrasaun Munisipál Baucau liuhosi Prezidente Autoridade husu ba komunidade hotu atu kria pás durante selebrasaun festa Natal no tinan foun.
Prezidente Autoridade Munisipál (PAM) Baucau, Olivio ‘Bou-lesa’ Freitas, esplika, ema hotu iha direitu moris iha situasaun hakmatek nune’e husu ba joven sira atu kontribui ba pás no estabilidade iha kada suku, postu administrativu nune’e povu goza liberdade liuliu iha tempu festa Natál no tinan foun.
“Loron boot ita tenke kria estabilidade no pás atu nune’e ema hotu-hotu bele goza liberdade iha loron-boot.”
Bou-lesa, argumenta, situasaun iha Baucau presiza hakmatek nune’e husu ba membru organizasaun arte-marsiál (OAM) no arte-ritúal halakon tiha odiu vingansa no tenke kaer liman atu unidade hodi hasoru Natál no tinan foun.
Bou-lesa hakarak munisípiu Baucau tenke sai ezemplár ba munisípiu seluk katak ho hanoin dame nune’e situasaun hakmatek hodi hasoru dezenvolvimentu iha tinan-2024 mai.
Jornalista : Natalino Belo
Editór : Evaristo Soares Martins
