DILI, 18 dezembru 2023 (TATOLI)—Ministériu Solidariedade Sosiál no Inkluzaun (MSSI), liuhosi Dirasaun Nasionál Inkluzaun no Reinsersaun Komunitária (DNIRC, sigla portugés), Departamentu Protesaun, Reinsersaun Idozu no Grupu Vulneravél realiza formasaun ida kona-ba forum teatru prevensaun konflitu ba joven na’in-20 iha munisípiu Liquiça.
Formasaun ne’e ho objetivu atu fó koñesimentu no kapasitasaun ba joven sira hodi bele iha kbiit atu rezolve problema sosiál ne’ebé mosu iha komunidade no suku laran, no atu halo prevensaun ba konflitu sira nune’e komunidade bele moris iha pás no estabilidade nia laran.
“Objetivu loloos hosi fórum teatru ba prevensaun konflitu ida-ne’e atu kontribui ba feto pás no seguransa. Tanba ne’e, formasaun ida-ne’e MSSI halo atu envolve joven feto no mane sira atu ativu iha sira ninia família no komunidade ba iha prevensaun konflitu nian,” Xefe Departamentu Protesaun, Reinsersaun Idosus no Grupus Vulneravél, Januario Gomes, hateten liuhosi nota ne’ebé Agência Tatoli asesu, segunda ne’e.
Formandu na’in-20 ne’e kompostu hosi feto na’in-10 no mane-10. Formandu sira-ne’e reprezenta suku ida-idak hosi postu administrativus tolu (3) iha munisípiu Liquiça no durasaun ba formasaun ida-ne’e sei hala’o durante semana ida-nia laran.
Ho formasaun ida-ne’e, nia espera katak joven sira bele iha koñesimentu ida-ne’ebé mak kle’an, liuliu ba forum teatru ne’e rasik hodi nune’e sira iha kbiit hodi halo dezeña teatru ne’ebé bele reprezenta ba sira ninia komunidade ba problema sosiál.
Diretór Sentru Solidariedade Sosiál Munisípiu Liquiça (SSSML), Júlio Ribeiro, hateten formasaun ida-ne’e hanesan meiu ida atu rezolve problema no halo prevensaun ba problema sosiál sira iha komunidade, nune’e bele kria situasaun ida-ne’ebé pás, estabilidade no bele fó biban ba dezenvolvimentu Timor-Leste nian.
Jornalista : Osória Marques
Editór : Cancio Ximenes
