PAM Baucau sensibiliza Lei Suku ba lideransa komunitária sira
BAUCAU, 18 dezembru 2023 (TATOLI) – Lideransa komunitária segunda ne’e, partisipa atividade sensibilizasaun kona-bá lei-númeru 9/2016 kona-ba xefe suku iha munisípiu Baucau.
Prezidente Autoridade Munisipál (PAM) Baucau, Olivio ‘Bou-lesa’ Freitas, esplika, objetivu hosi sorumutu refere atu fahe informasaun ba lideransa komunitária hotu tanba presiza iha koñesementu kona-bá kompeténsia xefe suku nian ne’ebé prevee iha lei-númeru 9/2016.
“Ita halo manas fali atu nune’e sira hala’o knaar labele sala tanba kompeténsia hotu-hotu hakerek ona iha lei-númeru 9/2016,” Prezidente Autoridade Munisipál Baucau hateten iha Sentru Konvensaun Baucau (CCB, sigla portugés).
Autoridade Administrasaun Munisipál Baucau liuhosi diresaun organizasaun naun-governamentál komunitária realiza sensibilizasaun refere nune’e hasa’e koñesimentu ligadu ho knaar no kompeténsia iha kada órgaun suku munisípiu Baucau nian.
Ho responsabilidade ne’ebé todan nune’e presiza tenke domina lei-númeru 9/2016 tanba ne’e xefe suku sira sei servisu direita iha komunidade no ajuda haklaken programa hosi Governu Sentrál no autoridade munisípiu.
“Povu mak eleitu hosi povu, sira tenke iha responsabilidade todan liu tanba to’o tinan-hitu,” Bou-Lesa akresenta.
Xefi suku Samalari, postu administrativu Baguia, Maria Lusia Agostinha da Silva, konsidera importante tebes atu hatene kona-bá papél lideransa komunitária nian tuir lei-númeru 9/2016 tanba sei oreinta xefe aldeia, delegadu no membru orgaun konsellu suku.
“Ha’u eleitu foun entaun inportante atu hatene nune’e bele hala’o knaar no atividade tuir lei,” Maria da Silva hateten.
Partisipa iha sensibilizasaun refere maihosi xefe suku hamutuk na’in-59 komposta hosi xefe suku foun na’in-26 no re-eleitu hamutuk 33 no xefe aldeia na’in-281 ne’ebé eleitu iha eleisaun komunitária iha fulan-novembru tinan-ne’e.
Jornalista : Natalino Belo
Editór : Evaristo Soares Martins
