SeKoop sei tau matan ba mákina prosesamentu Sorghum iha Guiço Maubara
DILI, 21 dezembru 2023 (TATOLI) – Sekretáriu Estadu Kooperativa (SeKoop), Arsenio Pereira, hateten SeKoop sei tau matan fila fali ba mákina prosesamentu Sorghum ne’ebé molok ne’e Governu Konstitusionál VIII halo ona lansamentu iha área Guiço, Postu Administrativu Maubara, Munisípiu Liquiça.
Nia rekorda, mákina prosesamentu Sorghum sira ne’e halo lansamentu iha 2020 iha Guiço, ho objetivu atu halo prosesamentu ba Sorghum nudar ai-han nasionál no sai ai-han merenda eskolár.
“Agora mak ami kontinua fali hodi haree mákin sira ne’ebé agora iha Guiço, tanba iha ne’ebá ita halo lansamentu ona iha mákina prosesamentu ba Sorghum hodi bele prodús Sorghum ba foos ba ai-han, inklui ba juice no ba produtu sira seluk hodi fornese ba merenda eskolár”, Arsenio Pereira, hateten iha programa entervista ezklusivu iha TATOLI.IP Farol, kinta ne’e.
Governante ne’e dehan, mákina hirak ne’e modern no bele halo prosesamentu Shorghum ho tipu oioin hanesan ba foos no ain-han sira seluk inklui bebidas hanesan juice, maibé Sekretáriu Estadu Koooperativa sesante iha nia mandatu ladún tau atesaun ba ekipamentu sira maske mákina sira ne’e hola iha tempu VIII Governu.
“Felismente mákina sira ne’e la kontinua tanba Sekretáriu Estadu Kooperativa SeKoop ida sesante ne’e mai foku ba kooperativa kréditu sira entaun ladún foku ba kooperativa produsaun no agora mak ita atu kontinua”, nia dehan.
Arsenio hateten, Movimentu Kamponezes Timor-Leste (MOKATIL) mós hola ona mákina ba prosesamentu Sorghum atu sai produtu ne’ebé bele sai fali ai-hán hodi ema bele konsumu.
“Ha’u rasik garante katak produsaun ba Sorghum sei aumenta ho kuantidade bo’ot. Produsaun Sorghum barak ne’e hosi Covalima tinan ne’e sira prodús iha ektár 430 no ha’u halo ona koilleta. Ita mós iha tán fatin seluk hanesan Manufahi no Natarbora mós prodús Sorghum barak”, nia adianta.
“Ita mós agora iha tán rai ne’ebé prepara atu kuda Sorghum ne’e iha 1.000 etáre iha époka atu kuda, tanba ne’e mak hahú tinan oin produsaun Sorghum sei barak liután, ita-nia mákina prosesamentu sira ne’e dala ruma la augenta”, nia konklui.
Jornalista: Natalino Costa
Editór : Zezito Silva
