BAUCAU, 28 dezembru 2023 (TATOLI) – Prezidente Autoridade Munisipál (PAM) Baucau louva ho maturidade komunidade liuliu joven sira ne’ebé kontribui pás no kria estabilidade durante selebrasaun Natál no espera hatudu tán iha tinan foun.
Prezidente Autoridade Munisipál (PAM) Baucau, Olivio ‘Bou-lesa’ Freitas, esplika, nu’udar ema umanu sempre iha evolusaun, liuliu atetude nune’e hosi observasaun jerál liuhosi kontaktu entre lideransa komunitária maioria suku laiha konflitu durante selebrasaun loron Natál nune’e husu atu joven sira kontinua kria pás no estabilidade hodi simu tinan foun 2024 mai.
“Ha’u lasimu informasaun ruma hosi suku 59 iha munisípiu Baucau mosu problema, ne’e signifika komunidade iha ona maturidade no vizaun kona-ba dezenvolvimentu ba nasaun,” Prezidente Autoridade Munisipál Baucau hateten iha Vila Nova, kinta ne’e.
Bou-lesa husu inan-aman atu kontinua eduka oan sira iha uma-laran hanesan ativu iha atividade pozitivu nune’e bele hamenus konflitu iha munisípiu Baucau.
Alende ne’e, juventude ne’ebé envolve iha Orgaznizasaun Arte-marsiál (OAM) no Rituál atu iha tempu Natál bele fo liman ba malu hadame tanba la’ós prepara de’it fíziku maibé presiza hasa’e morál nune’e edukadu bainhira moris iha sosiedade.
“Natál ita selebra liu ona, presiza asegura to’o tinan foun to’o ba fururu tanba nasaun responsabilidade ema hotu-hotu nian,” Bou-Lesa akresenta.
Jornalista : Natalino Belo
Editór : Evaristo Soares Martins
