MKI atribui sertifikadu no osan ba empreza nasionál 46
DILI, 29 dezembru 2023 (TATOLI)—Governu liuhosi Ministériu Komérsiu Indústria (MKI), kinta (28/12), atribui sertifikadu rekoñesimentu ‘Business Excellent Award 2023’ nian ba empreza nasionál na’in-46.
Ministru Komérsiu Indústria (MKI), Filipus Nino Pereira, hateten, sertifikadu ne’ebé Governu atribui ba empreza nasionál sira ne’e ho objetivu fó rekoñesimentu ba sira-nia ezisténsia atividade negósiu ne’ebé durante hala’o liu tinan lima.
“Ita-nia empreza nasionál sira ne’ebé hala’o negósiu liu tinan lima, merese hetan sertifikadu. Ho ida ne’e mak ita atribui sertifikadu apresiasaun ba empreza na’in 46 tanba sira iha komitmentu ne’ebé boot hala’o sir-nia negósiu iha situasaun difísil nia-laran hanesan COVID-19,” Filipus Nino Pereira, hateten, iha salaun Multiusos GMN, Bebora Dili.
Nia hatutan, sertifikadu apresiasaun ne’ebé MKI fó ne’e iha kategória haat mak empreza automóvel, Pekena empreza, media empreza no grande empreza.
Hosi empreza 46 ne’e, empreza automóvel na’in 10 hetan sertifikadu ho osan $2.000, no empreza pekena na’in 20 hetan sertifikadu ho osan $1.500.
“Osan ne’ebé sira hetan bele haboot tan sira-nia atividade negósiu ne’ebé la’o ona. Enkuantu media empreza sia (9) no grande empreza hitu (7) seluk hetan sertifikadu apresiasaun hosi Governu tanba bele diversifika ekonómia no bele fó ona servisu ba maluk timor-oan,” nia esklarese.
Membru Governu ne’e rekoñese, atividade ne’ebé sira halo foin dahuluk Timor-Leste bele selebra ‘Business Excellent Award 2023’ ba empreza nasionál sira, no hatene sei iha tan servisu lubuk ne’ebé Governu presiza halo iha futuru.
“Ha’u husu emprezáriu sira seluk ne’ebé daudaun seidauk bele partisipa iha atividade ne’ebé halo Governu ne’e, hanoin bele halo esforsu an tinan oin mai bele partisipa hotu,” nia hateten.
Iiha fatin hanesan, Diretór ACELDA,Lda, Higinio da Costa, hato’o agradese tebes ba Governu ne’ebé fó ona sertifikadu apresiasaun ba nia empreza, liuliu bele fó apresiasaun ba empreza automóvel, Pekena empreza, media empreza no grande empreza.
“Ida ne’e maneira ida hosi Governu apoiu setór privadu sira oinsá bele dezenvolve negósiu sira. Ha’u-nia parte sei halo esforsu no servisu di’ak liután iha parte agríkola hodi responde ba nesesidade konsumidór nasionál no internasionál,” nia dehan.
Empreza nasionál ne’ebé hetan sertifikadu apresiasaun iha kategória haat hanesan, empreza automóvel rasik mak Zidnio 2004, Saknuka Unip, Lda, Tiano Laktel Namo, Lda, aitola, Puk, Nelni Qui, Diantera, Rotan Seu Tulang, Loja Damonlou, Lakman, Unip, Lda; Zito Moco.
Empreza pekena, Aranda Lospar, Unipessoal, Sania, Mara Mresa Café Lda, RELLY STAR; FEMENATIN Unipessoal, Lda; Loja TATOLI, Raimundo Marcal, Batako Filemo Unip, Lda, Diborna Unip, Lda, Airira Unipessoal Lda, Codram Unip, Lda, Lawankaras, VML, Leo Atsabe, Belamor; SOJAREMOR, Sonira Larisa, Unipessoal, Mahowen Loro, Unipessoal, Cidade Backery, no Limaas, Lda.
Nune’e, média empreza rasik mak, Naza Construction, Estrela Gleno Unipessoal, Vicarman, unip Lda, LINSARELFRI XVIII Unipessoal, Black Smith Unip, Lda, Winforever Unip, Lda, AFIFRA Unipessoal, Lda.
Ba empreza grande mak ACELDA Unip, Lda, Manufahi Liu, Lda, Robinson Lda, Borala Lda, LM Caicasa Metin, Gota, Air Mineral, Consarcio Austim Beverage, SA; Starking no Lisun.
Jornalista : Arminda Fonseca
Editór : Florencio Miranda Ximenes
