Edukasaun Baucau husu jestór eskola hadi’a jestaun iha tinan letivu foun
BAUCAU, 08 janeiru 2024 (TATOLI) – Serbisu Munisipál Edukasaun Baucau husu ba jestór kada ensinu eskolár sira atu hadi’a jestaun pedagójika ho administrasaun finansa durante tinan letivu 2024.
Diretór Serbisu Munisipál Edukasaun Baucau, Augosto Ornai Ximenes, esplika, prosesu preparasaun ba tinan letivu foun hahú iha loron-4 janeiru hanesan jerente eskolár sira halo divizaun sala aula, tarefa oráriu no sei abertura inísiu aprendijazen no sei loke ho misa hodi selebra loron mahein edukasaun Baucau, São João Bosco iha loron-16 janeiru.
“Husu jestór eskola hotu atu hadi’a jestaun pedagójika iha nível sekundária no administrasaun finansa,” Diretór Serbisu Munisipál Edukasaun informa ba Agência TATOLI iha Vila Nova, segunda ne’e.
Alende ne’e, kada ensinu halo orientasaun hodi fó koñesimentu ambiente eskola no regulamentu, limpeza no fahe sala aula ba estudante foun sira hanesan estudante pasajen siklu no ensinu báziku ba sekundária.
Maske Ministériu Edukasaun fó-sai despaxu kona-bá prosesu ezekusaun programa tarde maibé husu diretór eskolár hotu ezekuta atividade no relatóriu tuir tempu.
“Ami sei halo preparasaun tuir oráriu Bispu Baucau nian hodi partisipa misa abertura,” Augosto Ximenes akresenta.
Liuhosi diploma foun kona-bá regulamentu ezame finál ba estudante sira hanesan atensaun atu edukasaun hamutuk ho eskola hotu atu mellora jestaun pedagójika nune’e durante prosesu aprendijazen bele hadi’a di’ak liután matéria ba preparasaun ezame nasionál.
Tuir dadus totál eskola iha munisípiu Baucau hamutuk 243, komposta hosi pre-eskolár hamutuk 30, ensinu báziku 185, sekundária 23 no tékniku vokasionál hamutuk lima.
Jornalista : Natalino Belo
Editór : Evaristo Soares Martins
