KIKF transforma produtu to’os-na’in sai pakote embalajen modernu
DILI, 11 janeiru 2024 (TATOLI)—Kooperativa K’nua Indústria Kreativu no Formasaun (KIKF) transforma produtu lokál hosi to’os-na’in sira hanesan batar no aifarina sai produtu embalajen modernu.
Peskizadór KIKF, José Pinto, hateten, planu inísiu produtu iha embalajen tenke uza produtu lokál 90%.
“Ami-nia motivasaun halo chips ne’e mak ita haree tanba importasaun barak, entaun ita mós koko halo rasik no iha hanoin oinsá valoriza produtu to’os-na’in sira ho kapasidade ne’ebé ita iha bele transforma moderniza oituan ka industrializa sai pakote embalajen ne’ebé iha kualidade ho padraun di’ak,” Peskizadór informa liuhosi programa entrevista eskluziva live streaming iha estúdiu Agência Tatoli, kinta ne’e.
Nia dehan, KIKF harii ho misaun transforma produtu lokál hanesan batar, fehuk, talas no seluk tan sai pakote embalajen ho kualidade di’ak no vizaun mak halo produtu sira ho padraun di’ak, nune’e bele tau iha merkadu nasionál no hanoin mós ba iha internasionál.
“Bainhira ita la hahú agora, maka importasaun kontinua tama no sei domina iha ita-nia rai, maski ita rasik iha produtu barak,” nia akresenta.
Notísia relevante : Na’in ba loja retallu husu agrikultór kuda produtu lokál barak
Nune’e, kooperativa ne’e tenta halo uluk batar tanba haree komunidade iha territóriu laran kuda hotu produtu ne’e, entaun bainhira presiza fasil atu hetan no atu muda batar sai chips ne’e mós difísil oituan tanba toos.
KIKF sosa batar no aifarina hosi família kooperativa tanba sira ne’e hamahon-an iha kooperativa multisetorál.
“Maibé daudaun ne’e ami mós hanoin ona membru sira hahú kuda rasik ona batar no aifarina nune’e iha futuru la presiza sosa tan,” nia hato’o.
Pakote embalajen batar no aifarina ne’e rasik fa’an kaixa ida iha falun 24 ho folin $15, bainhira fa’an ketak, falun ida $,075. Daudaun ne’e fa’an ona iha merkadu nasionál no posibilidade atu partisipa iha espozisaun sira ne’ebé Governu realiza.
Matéria prima ne’ebé kooperativa ne’e uza halo chips ne’e maihosi produtu lokál rasik no uza temperus produtu lokál hotu.
KIKF harii iha tinan 2021, ne’ebé iha inísiu halo produsaun la’o ho blender de’it maibé agora iha ona mákina rasik. Kooperativa ne’e harii ho fundadór na’in-ualu no agora iha ona membru 20 resin.
“Agradese ba Governu tanba ami hetan mákina ba embalajen nian hosi Ministériu Komérsiu no Indústria (MKI), bainhira ami tuir kompetisaun negósiu inovativu, no Sekretaria Estadu Kooperativa (SEKoop) mós apoiu mákina balun, ne’ebé daudaun mákina sira ne’e mak suporta ami-nia produsaun,” nia tenik.
Difikuldade ne’ebé kooperativa hasoru desde inísiu mak kapitál no mákina laiha, maibé ho tempu ne’ebé la’o, membru siranidentifika problema no buka maneira hodi rezolve, hanesan buka fundu.
“Dezafiu kiik balun ne’ebé ami enfrenta mak presiza tan mákina balun atu kompleta iha mákina produsaun maibé espera ba oin bele halo kompletu,” Peskizadór kooperativa haktuir.
Jornalista : Arminda Fonseca
Editora : Julia Chatarina
