Profisionál Saúde na’in-139 hosi Baucau la kontinua kontratu
BAUCAU, 11 janeiru 2024 (TATOLI) – Profisionál Saúde na’in-139 hosi munisípiu Baucau la kontinua serbisu tanba remata kontratu iha fulan-dezembru tinan 2023 liubá.
Diretór Serbisu Munisipál Saúde Baucau, Domingos Reinaldo Guterres, esplika, hosi tótal númeru funsionáriu hirak-ne’e komposta hosi rejime espesiál na’in-124 no rejime jerál hamutuk na’in-15 ne’ebé durante ne’e hala’o kna’ar iha sentru no postu saúde inklui motorista ambulánsia iha autoridade munisipál Baucau.
“Sira para hotu serbisu inklui doutór espesialista na’in-rua,” Diretór Serbisu Munisipál Saúde Baucau informa ba Agênsia TATOLI iha Vila Antiga, kinta ne’e.
Rejime espesiál antes ne’e kontratu hosi Ministériu Saúde hamutuk 124 ne’ebé hala’o kna’ar nu’udar implementadór programa no atendimentu komunidade iha postu no sentru saúde, apoia epidemiolojia ne’ebé kontratu liuhosi fundu Covid no Orsamentu Jerál Estadu (OJE).
Hosi 124 rejime espesiál kompostu apoia iha vizilánsia epidemiolojia liuhosi fundu Covid-19 hamutuk na’in-14 no nain-110 inklui doutór espesialista surjikál Philip no Dewa iha área dentária kontratu liuhosi OJE ne’ebé durante ne’e apoia iha sentru no postu saúde no funsionáriu balun sei kontinua voluntáriu.
Enkuantu rejime jerál hamutuk funsionáriu na’in-15 komposta hosi área administrasaun na’in-10 no motorista multi funsaun no ambulánsia na’in-lima ne’ebé kontratu hosi Administrasaun Munisipál liuhosi Ministériu Administrasaun Estatál.
“Molok kontratu remata, ami hato’o ona pedidu atu estende maibé la responde hosi Ministériu Saúde,” Domingos Guterres akresenta.
Domingos Guterres, konsidera funsionáriu motorista ambulansia na’in-lima ne’ebé kontratu liuhosi rejime jerál nia kna’ar importante tanba sempre prontu oras 24 atu atende transporta komunidade bainhira hasoru situasaun difísil.
Saúde Baucau to’o agora kontinua esforsu atu hato’o pedidu ba MS no Autoridade Munisipál hodi solusiona problema refere tanba konsidera funsionáriu hirak-ne’e importante hala’o serbisu iha terrenu.
“Maske sira seidauk asina kontratu maibé sira kontinua serbisu voluntáriu tanba motorista ambulánsia importante hodi responde ba komunidade,” Domingos argumenta.
Serbisu Munisipál Saúde Baucau konsidera ho problema kontratu funsionáriu hirak-ne’e fo impaktu ba atendimentu públiku, liuliu aumenta serbisu dupla ba funsionáriu kontratu sira iha baze nune’e labele foka tuir área esensiál sira.
Jornalista : Natalino Belo
Editór : Evaristo Soares Martins
