Diresaun Pekuária kontinua identifika kauza fahi mate iha Baucau
BAUCAU, 12 janeiru 2024 (TATOLI) – Serbisu Munisipál Agrikultura, liuhosi Diresaun Pekuária kontinua identifika no halo prevensaun ba fahi mate iha munisípiu Baucau.
Diretór Serbisu Munisipál Agrikultura Baucau, Moisés Lobato Perreira, esplika, aktu identifikasaun no prevensaun refere hala’o tanba animal hanesan fahi kontinua hasoru moras no mate iha área Venilale, Baucau Vila no Baguia.
“Ita hahú la’o ona maibé importante mak kontinua fó hanoin ba hakiak na’in sira nune’e bele kontrola no izola,” Diretór Serbisu Munisipál Agrikultura Baucau hateten iha Vila Nova, sesta ne’e.
Parte Diresaun pekuária kontinua husu hakiak na’in sira atu izola animal iha luhan tanba métodu refere nu’udar aktu prevensaun dahuluk ne’ebé antes ne’e halo ona estudu no rezulta animal ne’ebé izola lahetan moras kompara ho animal ne’ebé husik livre.
Alende ne’e, prevensaun seluk mak presiza uza ropa protesaun, fase liman no labele utiliza hahaan importadu hodi fó haan fahi.
“Métodu ne’e hanaran bio seguransa, tenke sulan iha luhan sira nune’e moras iha fatin seluk labele daet,” Moisés Perreira akresenta.
Kazu fahi moras hanaran virus African Swine Fever (ASF) ne’ebé mai ho síntoma isin manas, iis boot no halo kulit mean.
Jornalista : Natalino Belo
Editór : Evaristo Soares Martins
