COVALIMA, 15 janeiru 2024 (TATOLI) – Administrasaun Munisípiu Covalima (AMC) hamutuk ho veteranu halo diálogu ho inan no aman estudante na’in-206 hodi buka solusaun ba estudante finalista husi Eskola Bázika Sentrál ne’ebé hakarak kontinua sira-nian estudu iha Eskola Sekundária Jerál Públiku (ESJP) Suai.
Sekretáriu Administrasaun Munisípiu Covalima, Francisco Alves, dehan, bazeia ba rezultadu husi diálogu ne’e, autoridade Covalima submete karta atu buka solusaun relasiona ho despaixu husi Ministériu Edukasaun ne’ebé husu eskola simu estudante ho limite, tanba falta sala aula.
Aleinde ne’e, Ministériu Edukasaun hasai sirkulár bandu profesór sira labele rekolla osan husi inan no aman estudante sira, nune’e profesór barak mak termina sira-nia kontratu iha tinan 2023 nia rohan.
Ho kestaun ne’e, autoridade iha responsabilidade aprezenta problema bainhira inan no aman estudante hato’o preokupasaun, maske kompeténsia la’ós iha autoridade.
“Rezultadu diálogu ho inan no aman estudante, autoridade foti opsaun submete karta ba Ministériu Edukasaun no fahe informasaun ba inan no aman no eskola agora sei kontinua simu estudante atu rejistu”, dehan.
Karta autoridade Covalima nian ne’ebé sei submete ba ME ho konteúdu preokupasaun inan no aman nian ne’ebé hakarak nia oan sira kontinua eskola iha ESJP. Karta ne’e sei aprezenta iha loron 16 janeiru ne’ebé sei asina husi Administradór Munisípiu Covalima, Francisco de Andrade.
Reprezentante Prezidente Konsellu Veteranu, Joaquim da Costa, reforsa katak Autoridade Covalima hamutuk ho konsellu veteranu foti opsaun atu submete pedidu ba Governu hodi haree futuru estudante 206 ne’ebé hakarak kontinua sira-nian estudu iha Eskola Sekundáriu Jerál Suai.
Diretór Servisu Edukasaun Covalima, Francelino Carvalho, klarifika, Edukasaun esforsu hodi submete de’it relatóriu, tanba labele foti desizaun no tenke kumpre orientasaun.
“Despaixu Ministériu Edukasaun sai ona, ami tenke submete tanba ami hato’o ona meiu hotu no ministériu haruka ona ekipa inspesaun mai ona munisípiu, maibé laiha solusaun”, relata.
Reprezentante inan no aman estudante, Jaime Mendonça, relembra katak, antes ne’e, Ministériu Edukasaun la limita eskola simu estudante, maibé tinan ne’e limita alunu sira atu eskola.
“Ami esforsu dudu ami-nian oan sira atu bá eskola [ESJP], Estadu limita no haruka ami-nian oan sira eskola iha tekniku-vokasionál Akar Laran, maibé haree ba distánsia no ekonómia uma-laran la to’o”, dehan.
Jaime Mendonça hakarak nia oan eskola iha ESJP Suai, nune’e la presiza gasta osan atu selu ojek husi Ogues bá Akar Laran.
Bazeia ba despaixu refere maka Eskola Sekundária Jerál Públiku Suai iha tinan 2024 simu estudante 540, Eskola Sekundária Fohorem 90, maibé foin 50-resin, Zumalai 270 no sei falta 100 no Eskola Tékniku Vokasionál Akar Laran 350 no foin rejista 28.
Notísia relevante: Despaixu ME orienta eskola sekundária sira simu estudante ho limite
Jornalista: Celestina Teles
Editora: Maria Auxiliadora
