PNTL husu apoia Igreja iha área seguransa
BAUCAU, 15 janeiru 2024 (TATOLI) – Komandu Polísia Nasionál Timor-Leste (PNTL) husu apoia Igreja Katólika liuhosi Dioseze Baucau atu ajuda kontribui ba PNTL iha área seguransa.
Komandante jerál PNTL, Komisáriu jerál Polísia, Henrique da Costa, esplika, liuhosi sorumutu ho bispu Dioseze Baucau nu’udar parte kongratulasaun no hato’o agradesimentu ba kolabrasaun entre Igreja ho autoridade seguransa durante selebrasaun loron boot natal no tinan foun.
“Nafatin husu apoia hosi parte igreja ba serbisu PNTL nian,” Komandante jerál PNTL hateten iha Vila Nova, segunda ne’e.
Eis Komandante PNTL munisípiu Dili ne’e hato’o apresiasaun ba membru hotu tanba konsege asegura no atua seguransa iha munisípiu Baucau durante hakat tinan tuan ba foun ho hakmatek no laiha pertubasaun orden públiku.
Maske rekursu umanu iha Baucau menus maibé situsasaun iha Baucau kontroladu tanba iha kooperasaun entre membru PNTL, sosiedade no komunidade.
“Husu atu Komandante sira hotu kontinua mantein komunika di’ak ho komunidade sira nune’e futuru fó susesu ba serbisu PNTL nian loron-loron,” Hendriue da Costa akresenta.
Bispu Dioseze Baucau, Dom Leandro Maria Alves, esplika, sorumutu entre Igreja Katólika ho komando Polísia Nasionál Timor-Leste (PNTL) foku liu kona-ba asuntu seguransa iha rai-laran inklui fahe hanoin ba malu liuliu membru PNTL iha área atendimentu ba komunidade iha Dioseze Baucau.
“Realidade hatudu durante loron boot liu ba Polísia sira halao sira-nia knaar ho di’ak, koopera ho Igreja durante selebrasaun natal no tinan foun lao hakmatek mesmu iha situsasaun balun akontese oituan,” Dom Leandro Alves hateten.
Bispu Baucau, argumenta, serbisu PNTL área luan maibé hasoru difikuldade iha rekursu umanu tanba ne’e presiza aumenta membru foun, lojístika hanesan transporte nune’e responde ba problema ne’ebé akontese iha komunidade.
Dom Leandro husu komunidade atu koorpera ho autoridade seguransa liuliu koordena bainhira mosu dezentendimentu iha baze liuliu rezolve ho ulun malirin nune’e nasaun iha situasaun hakmatek laran.
“Depende ba rekursu iha membru Polísia ne’ebé destaka iha terrenu,” Dom Leandro Alves akresenta.
Prezensa Komandante Jerál PNTL, Komisáriu Jerál Polísia, Henrique da Costa akompaña hosi espoza hamutuk ho estrutura komandu nasionál ne’ebé alende sorumutu ho Dioseze Baucau halao mos enkontru ho membru komando PNTL Baucau.
Jornalista : Natalino Belo
Editór : Evaristo Soares Martins
